नयाँ दिल्ली: श्रीलंकाविरुद्ध आउँदो महिना हुने टेस्ट शृंखला अघि भारतीय क्रिकेट कण्ट्रोल बोर्ड (बीसीसीआई)-ले केही ठूलो फसेला लिएको छ। बोर्डले भारतीय टोलीका सहायक प्रशिक्षक रेयान टेन डेस्काटे र फील्डिंग प्रशिक्षक टी दिलीपको अनुबन्ध विस्तार नगर्ने फसेला गरेको छ। बीसीसीआई सचिव देवजीत सैकियाले डेस्काटे र दिलीपको अनुबन्ध समाप्त भएको अनि त्यसलाई विस्तार नगरिने पुष्टि गरेका छन्। यसरी यी दुईजनाको भारतीय टोलीबाट बिदावारी भएको छ। टी दिलीपको अनुबन्ध समाप्त भएपछि बीसीसीआई-ले नयाँ फील्डिंग प्रशिक्षक खोज्ने प्रक्रिया शुरु गरिसकेको छ। भारतीय पुरुष क्रिकेट टोलीको निम्ति नयाँ फील्डिंग प्रशिक्षकको चयन गर्न अहिले २-३ जनाको नाममाथि विचार चलिरहेको अनि चाँड़ै नियुक्तिको घोषणा गरिने सैकियाले बताएका छन्। भारतले २०२४-को टी२० विश्व कप जितेपछि मुख्य प्रशिक्षक पदमा गौतम गम्भीरले राहुल द्रविड़को स्थान लिएका थिए। त्यस समय गम्भीरकै परामर्शमा डेस्काटेलाई भारतीय सपोर्ट स्टाफमा सामेल गरिएको थियो। गम्भीरका नजिकका साथीहरूमा एक मानिने यस पूर्व अलराउण्डरले टोलीको कोचिंग ग्रुपको हिस्सा बनेपछि ब्याटिंग र फील्डिंग दुवै विभागमा योगदान दिँदै सेटअप-को धेरै क्षेत्रमा काम गरेका थिए। गौतम गम्भीरको कार्यकालमा टेस्ट क्रिकेटमा भारतको दुर्दशा कसैसँग लुकेको छैन। यसबीच हालै आयरल्याण्ड र ईंग्ल्याण्ड यात्रामा ७ वटा टी२० म्याच खेलेर ६ वटा हारेपछि चाहिँ बीसीसीआई दबाउमा आएको थियो। यसैकारण बोर्डले डेस्काटे र दिलीपको कार्यकाल नबढ़ाउने फसेला गरेको छ। नीदरल्याण्ड्सका पूर्व कप्तान डेस्काटे एकपल्ट फेरि आईपीएल फ्रेञ्चाइजी कलकत्ता नाइट राइडर्स (केकेआर)-को कोचिंग टीममा सामेल हुने सम्भावना छ। खेलाड़ीको रूपमा उनी २०१२ र २०१४-मा आईपीएल खिताब जित्ने केकेआर टोलीको हिस्सा रहेका थिए। त्यसपछि २०२२-मा उनी फील्डिंग प्रशिक्षकको रूपमा फ्रेञ्चाइजीमा फर्किएका थिए। त्यस समय मुख्य प्रशिक्षक चन्द्रकान्त पण्डित र मेण्टर गौतम गम्भीरको मार्गदर्शनमा टोलीले अझ एउटा आईपीएल खिताब जितेको थियो।
बीसीसीआई सचिव सैकियाले भनेका छन्, सहायक प्रशिक्षक डेस्काटेको भारतीय पुरुष टोलीसँग २ सालको अनुबन्ध १० जूनमा समाप्त भएको थियो। यसरी १ सालको विस्तार पाउने फील्डिंग प्रशिक्षक टी दिलीपको अनुबन्ध ८ जूनमा समाप्त भएको थियो। बीसीसीआईले यी दुईजनालाई भारतको ईंग्ल्याण्ड यात्रा समाप्त भइञ्जेल टोलीमा कायम राख्यो। त्यसपछि चाहिँ बोर्डले यी दुईजनाको अनुबन्ध विस्तार नगर्ने फसेला गऱ्यो। अनुबन्ध समाप्त भइसकेको हुनाले यी दुईजनाबाट राजीनामा स्वीकार गर्ने पनि प्रश्न उठ्दैन। श्रीलंका यात्रामा भारतीय टोलीसँग नयाँ फील्डिंग प्रशिक्षक हुनेछन्। असमका शुभदीप घोष यस पदको होड़मा अघि रहेका छन्, जसले राहुल द्रविड़को राष्ट्रिय क्रिकेट एकाडमीमा ६-७ सालदेखि काम गरिरहेका छन्।