​सिलगढी: सिलगढी पुलिस कमिश्नरेट अन्तर्गतको बागडोगरा पुलिस थानाको टोलीले गोप्य सूचनाका आधारमा कारबाही गर्दै दुई जनालाई ब्राउन सुगरसहित पक्राउ गरेको छ।
​प्राप्त जानकारी अनुसार, ३१ जुलाई २०२६ को साँझ बागडोगरा थाना क्षेत्रको रङ्गापानी, धाजुजोतस्थित पुरानो वाटर फ्याक्ट्री नजिकै पुलिसले छापा मारेको थियो। त्यस क्रममा शङ्कास्पद अवस्थामा फेला परेका दुई जनालाई नियन्त्रणमा लिइयो। पक्राउ पर्नेहरूमा दार्जिलिङ जिल्लाको फाँसीदेवा थाना क्षेत्र अन्तर्गत मुन्सीबारी निवासी २९ वर्षीय मोहम्मद आइजुल र ४५ वर्षीय मोहम्मद साफिउल रहेका छन्।
​पुलिसले खानतलासी गर्दा उनीहरूको साथबाट २८३ ग्राम ब्राउन सुगर, दुई वटा मोबाइल फोन, एउटा स्कुटी र १०,५०० रुपैयाँ नगद बरामद गरी जफत गरेको छ।
​यस सम्बन्धमा बागडोगरा पुलिस थानामा लागूऔषध (एनडीपीएस) ऐनका सम्बन्धित धाराहरू अन्तर्गत मुद्दा दर्ता गरी थप अनुसन्धान अघि बढाइएको छ।