नयाँ दिल्ली: इण्डियन प्रीमियर लीग (आईपीएल) २०२७-को निम्ति खेलाड़ीहरूका लिलामी एकपल्ट फेरि भारतमा हुन गइरहेको छ। भारतीय क्रिकेट कण्ट्रोल बोर्ड (बीसीसीआई) सचिव देवजीत सैकियाले आईपीएल २०२७-को लिलामी दिसम्बर २०२६-मा गोवामा आयोजन गरिने पुष्टि गरेका छन्। गत ३ वटा संस्करणको लिलामी विदेशमा भएपछि यसपाली पहिलोपल्ट आईपीएल लिलामी भारतीय जमीनमा हुनेछ। बीसीसीआई सचिव सैकियाले बताएअनुसार, आईपीएल २०२७-को निम्ति खेलाड़ीहरूका लिलामी गोवामा हुनेछ। उनले लिलामीको सटीक तारिखको आधिकारिक घोषणा चाहिँ गरेनन्। सम्भावित कार्यक्रम अनुसार, लिलामी १४-देखि १६ दिसम्बरबीच हुनसक्छ। बीसीसीआईले आउँदो हप्ताहरूमा लिलामीको तारिख, रिटेन्शनको समयसीमा र सेलरी क्यापसँग सम्बन्धित जानकारीहरू फ्रेञ्चाइजीहरूसँग साझा गर्न सक्छ। आईपीएलको गत ३ सीजनको लिलामी भारतदेखि बाहिर आयोजन गरिएको थियो। साल २०२४-मा लिलामी दुबईमा, २०२५-को मेगा लिलामी सऊदी अरबको जेद्दामा अनि २०२६-को लिलामी अबू धाबीमा भएको थियो। यसरी लगातार ३ संस्करणपछि आईपीएलको लिलामी भारतमा फर्किरहेको छ। यसअघि अन्तिमपल्ट २०२३-मा खेलाड़ीहरूका लिलामी भारतमा भएको थियो। बीसीसीआईले यसअघि भारतमा शीतकालमा हुने विवाहको मौसमले गर्दा होटल र कन्वेन्शन हलको उपलब्धता ठूलो चुनौती हुने बताएको थियो। यसैकारण गत केही सालदेखि लिलामीको निम्ति विदेशलाई प्राथमिकता दिइएको थियो। सैकियाले भनेका छन्, लगातार ३ सत्र विदेशमा लिलामी आयोजन गरेपछि यसपाली हामी भारतमा फर्किरहेका छौं। दिसम्बर महिनामा गोवामा आईपीएको निम्ति खेलाड़ीहरूका लिलामी हुनेछ। उल्लेखनीय छ, यस साल हुने लिलामी मेगा लिलामी नभएर मिनी लिलामी हुनेछ। यो जारी ३ सालको खेलाड़ी रिटेन्शन चक्रमा टोलीहरूका निम्ति स्क्वाडमा फेरबदल गर्ने अन्तिम मौका हुनेछ। मेगा लिलामी जस्तो यसपाली फ्रेञ्चाइजीहरूलाई आफ्नो पूरा टोली फेरि तयार गर्ने आवश्यकता हुनेछैन। टोलीहरूले आफ्नो वर्तमान टोलीका खेलाड़ीहरूलाई कायम राख्दै रिलीज गरिएका खेलाड़ीहरूका स्थानमा नयाँ खेलाड़ीहरूलाई सामेल गरी टोलीको आवश्यकता पूरा गर्नमा ध्यान दिनेछ। मिनी लिलामीमा फ्रेञ्चाइजीहरूले आफ्नो टोलीको कमजोरीहरूलाई समाप्त गर्न उपलब्ध खेलाड़ीहरूमाथि बोली लगाउनेछन्। यसबाहेक रिलीज गरिएका खेलाड़ीहरूका स्थानमा विकल्पको खोज गरिनेछ अनि रहल पर्स राशिको प्रयोग गरिनेछ। गत विजेता रोयल च्यालेञ्जर्स बेंगलुरुसहित १० वटा फ्रेञ्चाइजीले लिलामी अघि आफ्नो रिटेन्शन र रिलीज सूचीलाई अन्तिम रूप दिनेछ।