मुम्बई: महिला टी२० वर्ल्ड कप २०२६-को तयारीहरू शुरु भइसकेको छ। यो प्रतिष्ठित टुर्नामेण्ट ईंग्ल्याण्डमा १२ जूनदेखि ५ जुलाईसम्म खेलिनेछ। भारतीय क्रिकेट कण्ट्रोल बोर्ड (बीसीसीआई)-ले शनिवार साँझ ५ बजी मुम्बई स्थित मुख्यालयमा २०२६ महिला टी२० वर्ल्ड कपको निम्ति १५ सदस्यीय टीमको घोषणा गर्नेछ। चयन प्रक्रिया पूरा भएपछि कप्तान हरमनप्रीत कौर, मुख्य चयनकर्ता अस्मिता शर्मा र बीसीसीआई सचिव देवजीत सैकियाले पत्रकार सम्मेलनमा १५ सदस्यी टीमको घोषणा गर्नेछन्। यसको साथमा चयन समितिले ईंग्ल्याण्डविरुद्ध २८ मईदेखि २ जूनबीच खेलिने ३ वटा टी२० म्याचको सीरीज, लर्डसमा १०-१३ जुलाईसम्म खेलिने एकमात्र टेस्ट म्याच र ईंग्ल्याण्ड ए विरुद्ध भारत ए टीमको चयन पनि गर्नेछ। महिला टी२० वर्ल्ड कपमा भारत ग्रुप १-मा रहेको छ। यस ग्रुपमा भारतसँग ६ पल्टको च्याम्पियन अष्ट्रेलिया, दक्षिण अफ्रिका, पाकिस्तान, बंग्लादेश र नीदरल्याण्ड रहेको छ। भारतीय टीमको टी२० प्रारूपमा फर्म त्यति असल रहेको छैन अनि हालै दक्षिण अफ्रिकाविरुद्ध ५ वटा म्याचको सीरीजमा टीमले ४-१-ले हारको सामना गर्नु परेको थियो। भारतीय टीम २०२०-मा अष्ट्रेलियामा खेलिएको टी२० वर्ल्ड कपमा उपविजेता रहेको थियो तर टीमले यस टुर्नामेण्टमा खिताब चाहिँ जित्न सकेको छैन। गत वर्ष घरेलु मैदानमा वनडे वर्ल्ड कपको खिताब जितेपछि भारतीय टीमको आत्मविश्वास बढ़ेको छ अनि यसपाली टीमसँग खिताब जित्ने असल मौका रहनेछ। महिला टी२० वर्ल्ड कपको निम्ति आयोजक ईंग्ल्याण्डको साथमा न्यूजील्याण्डले आफ्नो १५ सदस्यीय टीमको घोषणा गरिसकेको छ। यसपाली महिला टी२० वर्ल्ड कपमा रेकर्ड १२ वटा टीमले हिस्सा लिनेछ। टुर्नामेण्टको अवधि ७ वटा अलग-अलग स्थानमा जम्मा ३३ वटा म्याच खेलिनेछ।