​नयाँ दिल्ली: फुटपाथमा सुतिरहेकी एक १० वर्षीया बालिकाले मध्यरातमा आफ्नो बुबालाई अन्तिम पटक पुकार्दै भनिन्, “बाबा, मलाई बचाउनुस्।” तर, बुबाको आँखाकै अगाडि एक क्याब (ट्याक्सी) चालकले ती बालिकालाई जबरजस्ती कारमा हालेर फरार भयो। घटनाको केही घण्टापछि गुरुग्राम-फरीदाबाद सडक नजिकैको जंगलमा बालिकाको शव फेला परेको छ।
पुलिसका अनुसार बालिकामाथि क्रूरतापूर्वक बलात्कार गरेपछि स्कार्फले घाँटी थिचेर हत्या गरिएको हो।
​बुबाले गरे लखेट्ने प्रयास
यो हृदयविदारक घटना सोमबार बिहान करिब ५ बजेको हो। पीडित बालिकाका बुबाले दिएको बयान अनुसार, उनीहरू आफ्नो परिवारसँग फुटपाथमा सुतिरहेका थिए। अचानक छोरी चिच्याएको आवाज सुनेर ब्युँझिँदा उनले एउटा सेतो रङको ट्याक्सी चालकले छोरीलाई कारभित्र कोच्दै गरेको देखे। उनले दौडिएर कार समात्ने प्रयास गरे पनि चालकले तीव्र गतिमा गाडी गुडाएर फरार भयो। त्यसलगत्तै उनले नजिकै गुडिरहेको प्रहरीको गस्ती गाडीलाई घटनाबारे जानकारी गराए।
​७० वटा सीसीटीभी र जीपीएसको सहयोगमा पक्राउ
घटनाको गम्भीरतालाई हेर्दै पुलिसले तुरुन्तै अनुसन्धानका लागि ९ वटा विशेष टोली गठन गर्‍यो। पुलिसले उक्त क्षेत्रका करिब ७० वटा सीसीटीभी क्यामेराको फुटेज खंगाल्नुका साथै क्याबमा जडान गरिएको जीपीएसको मद्दतले गाडीको मार्ग पहिचान गर्‍यो। अनुसन्धानमा देखिए अनुसार आरोपीले अपहरण गर्नुभन्दा एक घण्टा अगाडि नै उक्त स्थानमा कार पार्क गरेर राखेको थियो।
​घटनाको ७ घण्टाभित्रै पश्चिमी दिल्लीको विकासपुरी क्षेत्रमा पुलिसले आरोपीलाई घेराबन्दी गर्‍यो। पुलिसलाई देखेपछि मोबाइल बन्द गरेर भाग्न खोज्दा प्रहरीको गोली लागेर आरोपी घाइते भएको छ र उसलाई अस्पताल भर्ना गरी नियन्त्रणमा लिइएको छ।
​पहिलेदेखि नै ५ वटा मुद्दा दर्ता
पुलिसका अनुसार पक्राउ परेका क्याब चालक मूल रूपमा बिहारका बासिन्दा हुन् र उनका श्रीमती तथा एक बच्चा छन्। ती चालकमाथि यसअघि पनि ५ वटा विभिन्न आपराधिक मुद्दा दर्ता भइसकेको खुलासा भएको छ। अचम्मको कुरा त, बालिकाको अपहरण र हत्या गरिसकेपछि पनि आरोपीले केही अन्य यात्रीहरूलाई आफ्नो क्याबमा राखेर यात्रा गराएको पाइएको छ। यस विभत्स घटनाबारे पुलिसले थप कानुनी अनुसन्धान अघि बढाएको छ।