​हुगली: भारतीय प्रधानमन्त्री नरेन्द्र मोदीले पश्चिम बंगालको हुगली जिल्लास्थित तारकेश्वरमा आयोजित ‘पश्चिम बंग दिवस’ कार्यक्रमलाई सम्बोधन गर्दै कांग्रेसमाथि गम्भीर आरोप लगाएका छन्। बंगालको इतिहास, संस्कृति र राजनीतिक परिवर्तनबारे चर्चा गर्दै उनले देश विभाजनका बेला कांग्रेसको भूमिकामाथि प्रश्न उठाएका हुन्।
​प्रधानमन्त्री मोदीले देश स्वतन्त्र हुने समयमा बंगाललाई पाकिस्तानमा गाभ्ने प्रयास भएको दाबी गरे। “त्यस चुनौतीपूर्ण घडीमा कांग्रेस दृढताका साथ उभिनुपर्थ्यो, तर उसले घुँडा टेक्यो,” मोदीले भने। इतिहासका यस्ता घटनाक्रमलाई देशले कहिल्यै बिर्सन नसक्ने उनले उल्लेख गरे। पश्चिम बंगालमा अब राजनीतिक परिवर्तनको नयाँ अध्याय सुरु भइसकेको र यहाँका जनताले भाजपालाई समर्थन गर्दै विकासको बाटो रोजेको उनको दाबी छ।
​पहिलो पटक मनाइयो ‘पश्चिम बंग दिवस’
पश्चिम बंगालमा पहिलो पटक आधिकारिक रूपमा ‘पश्चिम बंग दिवस’ आयोजना गरिएको हो। उक्त कार्यक्रममा पश्चिम बंगालका राज्यपाल र मुख्यमन्त्री शुभेन्दु अधिकारीको समेत उपस्थिति थियो। सम्बोधनका क्रममा प्रधानमन्त्री मोदीले बंगालको हजारौँ वर्ष पुरानो विरासत, संस्कृति, साहित्य र ज्ञान परम्पराको प्रशंसा गरे। बंगालले भारतको राष्ट्र निर्माणमा महत्त्वपूर्ण योगदान पुर्‍याएको भन्दै उनले घनश्याम दास बिडलाजस्ता उद्योगपतिहरूले राज्यको विकासमा खेलेको भूमिकाको स्मरण गरे।
​भाजपा सरकारद्वारा परिवर्तनको दाबी
प्रधानमन्त्री मोदीले भाजपाको आगमनसँगै बंगालमा सकारात्मक परिवर्तन देखिन थालेको र राज्य विकास, लगानी तथा रोजगारीको नयाँ दिशामा अघि बढेको बताए। विगतका सरकारहरूको कुशासनका कारण बंगाल दशकौँ पछि परेको उनको आरोप थियो। “पहिले जनताका प्राकृतिक स्रोत र साधनमाथि घुसपैठियाहरूको कब्जा थियो, जसका कारण आम नागरिकका अधिकार कमजोर भए,” उनले भने।
​कांग्रेस, लेफ्ट र टीएमसीमाथि प्रहार
प्रधानमन्त्रीले कांग्रेस, लेफ्ट र तृणमूल कांग्रेस (टीएमसी) ले मिलेर बंगाललाई बर्बादीतर्फ धकेलेको आरोप लगाए। उनले सभामा उपस्थित जनसमुदायलाई इतिहासको गल्ती नदोहोर्‍याउने संकल्प लिन अपिल गर्दै बंगालको भविष्य उज्ज्वल रहेको र राज्य देशको समग्र विकासमा नेतृत्वदायी भूमिका खेल्न तयार भएको बताए।