नयाँ दिल्ली: खिताब जित्ने प्रबल दावेदार मानिएको जर्मनीले फिफा वर्ल्ड कप २०२६-मा प्रभावशाली शुरुवात गऱ्यो। चारपल्टको विश्व विजेता जर्मनीले आफ्नो पहिलो म्याचमा वर्ल्ड कपमा पदार्पण गरिरहेको कुरासाओलाई ७-१-ले पिट्यो। अमेरिकाको ह्युस्टन स्टेडियममा भएको ग्रुप ई-को म्याचमा क्यारेबियन देश कुरासाओले वर्ल्ड कपमा पदार्पण गर्दै पूर्व च्याम्पियनविरुद्ध गोलको खाता खोल्न सफल भए पनि गोलको वर्षा भने रोक्न सकेन। म्याचमा जर्मनीले पहिलो हाफमा ३ र दोस्रो हाफमा ४ गोल गरी एकतर्फी जीत दर्ता गऱ्यो। जर्मनीको तर्फबाट काई हावेर्त्जले जोड़ी गोल गरे। यसबाहेक फेलिक्स एनमेचा, निको स्लोटरबेक, जमाल मुसिएला, नाथनियल ब्राउन र डेनिज उण्डाभले एक-एक गोल गरे। कप्तान जोसुआ किम्मिचले दुईवटा असिस्ट गरे। म्याचमा ६५ प्रतिशत पोजेशनको साथ खेल्ने जर्मनीको निम्ति एनमेचाले छैटौं मिनटमै गोलको खाता खोले। शुरुवाती बढ़त हासिल गरेपछि जर्मनीले कुरासाओमाथि लगातार दबाव बनायो। यसबीच कुरासाओका लिभानो कोमेनेन्सियाले २१औं मिनटमा गोल गरी स्कोर १-१-को बराबरीमा पुर्‍याए। म्याच बराबरीमा पुगेपछि जर्मनीले विपक्षी टीमलाई शीर उठाउने मौका दिएन।सेण्टरब्याक निको स्लोटरबेकले ३८औं मिनटमा गोल गरी जर्मनीलाई २-१-को बढ़त दिलाए। नाथनियल ब्राउनको कर्नरमा निकोले हेडरद्वारा गोल गरे। त्यसपछि हावेर्त्जले पहिलो हाफको इञ्ज्युरी टाइमको पाँचौं मिनटमा पेनल्टीद्वारा गोल गर्दा पहिलो हाफमा जर्मनी ३-१-ले अघि रहन पुग्यो। दोस्रो हाफमा पनि जर्मनी रोकिएन। जमाल मुसिएलाले ४७औं, ब्राउनले ६८औं र उण्डाभले ७८औं मिनटमा गोल गरे। पहिलो म्याचमै आरामदायक जीतपछि जर्मनीले ग्रुप ई-मा ३ अंक हासिल गऱ्यो। उल्लेखनीय छ, २०१४-मा ब्राजीलमा भएको वर्ल्ड कपको खिताब जितेपछि जर्मनी २०१८ र २०२२-को संस्करणमा चाहिँ ग्रुप चरणमै बाहिर भएको थियो। यसपाली चाहिँ पहिलो म्याचमै जीतको साथ जर्मनीले नक्आउट राउण्डमा पुग्ने सम्भावनालाई मजबूत बनाएको छ। जर्मनीले अघिल्लो म्याचमा आइभरी कोस्टको सामना गर्नेछ। यसरी कुरासाओले इक्वेडरविरुद्ध खेल्नेछ।
यसबीच म्याचमा दुईपल्ट पछाड़िए पनि एशियाई पावरहाउस जापानले म्याच बचाएर देखायो। डलास स्टेडियममा नीदरल्याण्ड्स र जापानबीच खेलिएको ग्रुप एफ-को म्याच २-२-ले ड्र रह्यो। दुई टीमबीच चरम रोमाञ्चक प्रतिस्पर्धा भयो अनि म्याचको जम्मै गोल दोस्रो हाफको खेलमा दर्ता गरियो। म्याचको ५०औं मिनटमा अनुभवी भर्जिल भान डाइकले हेडरद्वारा गोल गर्दै डच टीमलाई बढ़त दिलाए। त्यसको सात मिनटपछि जापानले पनि बराबरी हासिल गऱ्यो। केइतो नाकामुराले दर्शनीय गोल गरी जापानलाई म्याचमा कायम राखे। त्यसको सात मिनटमा नीदरल्याण्ड्सले फेरि बढ़त हासिल गऱ्यो। क्रिसेन्सो समरभिलले ६४औं मिनटमा नीदरल्याण्ड्सलाई म्याचको दोस्रो गोल दिलाए। चरम दबाउबीच जापानले फेरि पुनरागमन गऱ्यो। म्याचको ८९औं मिनटमा डाइची कामाडाले गोल गरी जापानलाई हार्नदेखि बचाए। कर्नरबाट आएको बलमा उनले हेडरद्वारा गोल गरे। त्यसपछि रहल समयमा दुवै टीमले प्रयास गरे पनि थप गोल हुन नसक्दा जापान र नीदरल्याण्ड्सले १-१ अंक बाँड़्यो।