नयाँ दिल्ली: संसदीय कार्यमन्त्री किरेन रिजिजूले बुधबार कांग्रेस नेता राहुल गान्धीको भाषण “झूटले भरिएको” आरोप लगाउँदै लोकसभामा विपक्षी दलका नेताले गरेका “झूटा” दाबीहरू कार्यवाहीको अभिलेखबाट हटाउन माग गरिने बताएका छन्।
केन्द्रीय बजेटमाथि भएको छलफलका क्रममा राहुल गान्धीको भाषण लगत्तै प्रतिक्रिया दिँदै रिजिजूले सत्तारूढ गठबन्धनका सांसदहरूले सभामुखसमक्ष सूचना दर्ता गराएर विपक्षी दलका नेताले व्यक्त गरेका प्रत्येक कथनको प्रमाणीकरण माग्ने बताए। उनले सञ्चारकर्मीसँग भने, “राहुल गान्धीले जे–जे झूट बोलेका छन्, ती सबै अभिलेखबाट हटाइनुपर्छ भन्ने हाम्रो माग हुनेछ।”
राहुल गान्धीले आफ्ना अभिव्यक्तिहरू प्रमाणित गर्ने वाचा गरे पनि मन्त्री रिजिजूले भने, “उहाँले ती कुरा प्रमाणित गर्न सक्नुहुन्न, किनकि उहाँले झूट बोल्नुभएको छ। सदनभित्रै झूट बोल्नुभएको हो।” उनले आरोप लगाए कि कांग्रेस नेता प्रायः जानाजानी झूट बोल्छन् र सम्बन्धित मन्त्रीको जवाफ नसुनी सदन छाडेर बाहिरिन्छन्। देशले लोकसभामा गम्भीर स्वभावका योग्य विपक्षी नेता नपाएको दुर्भाग्यपूर्ण अवस्था रहेको उनको टिप्पणी थियो।
हरदीप पुरीमाथिको आरोपको जवाफ दिइने:
रिजिजूले भने, “सदन बाहिर हामी राहुल गान्धीका झूटको जवाफ दिनेछौँ, तर सदनभित्र औपचारिक सूचना दर्ता गरिनेछ।” उनले पेट्रोलियम मन्त्री हरदीप सिंह पुरीमाथि पूर्वसूचना बिना गम्भीर आरोप लगाइएको दाबी गर्दै त्यसलाई विशेषाधिकार हननको विषय भएको बताए। “हामी आवश्यक जानकारी सभामुखसमक्ष प्रस्तुत गर्नेछौँ। बजेट छलफलमा विपक्षी दलका नेताले कुनै ठोस र उपयोगी योगदान नगरी निराधार आरोप मात्र लगाउनुभयो,” उनले भने।
संसदीय कार्यमन्त्रीले वित्तमन्त्री निर्मला सीतारमणले बजेटमाथिको छलफलको जवाफ दिने बेला विपक्षी दलका नेता सदनमा उपस्थित हुनुपर्ने आग्रह आफूले गरेको बताए। “भाषण दिएपछि उहाँ तुरुन्तै बाहिरिनुभयो। नियमअनुसार कुनै सदस्यले भाषण दिएलगत्तै सदन छाड्न मिल्दैन,” उनले उल्लेख गरे।
सभामुखप्रति अपशब्द प्रयोगको आरोप:
रिजिजूले २० देखि २५ जना कांग्रेस सांसदहरूले लोकसभा अध्यक्ष ओम बिर्लालाई उहाँकै कार्यकक्षमा अपशब्द प्रयोग गरेको दाबी पनि गरे। उक्त बेला वरिष्ठ कांग्रेस नेतृ प्रियंका गान्धी वाड्रा र केसी वेणुगोपाल उपस्थित भए पनि उनीहरूले सांसदहरूलाई नरोकेको उनको आरोप छ। “अध्यक्ष निकै मर्माहत हुनुभएको छ। उहाँ स्वभावले नरम भएकाले कडा कारबाही गर्नुभएको छैन,” उनले भने।
“केही सांसदहरू अध्यक्षको कक्षमा गएर अपशब्द बोले। २०-२५ जना सांसद त्यहाँ पुगेपछि म पनि पुगेँ। उहाँहरूका शब्दहरू बयान गर्न सकिँदैन,” रिजिजूले दाबी गरे। उनका अनुसार उक्त घटनाका बेला केही वरिष्ठ नेताहरूले सांसदहरूलाई उक्साउने कामसमेत गरेका थिए।