खरसाङ: भारतीय गोर्खा प्रजातान्त्रिक मोर्चाका अध्यक्ष अनित थापाले खरसाङको सिङ्गेलमा आयोजित चुनावी सभालाई सम्बोधन गर्दै प्रतिस्पर्धी दलहरूको “परिवर्तन” नाराप्रति कडा प्रहार गरे। यस विषयमा थापाले भने, केवल गीत बजाएर र नारा लगाएर परिवर्तन आउँदैन। “जसले परिवर्तनको परिभाषा नै बुझेको छैन, उनीहरू परिवर्तन भन्दै कराउँदै हिँडिरहेका छन्,” उनले भने। उनका अनुसार साँचो परिवर्तन व्यक्तिको आचरण, व्यक्तित्व र विचारबाट सुरु हुन्छ, र बिजीपिएम को अभियान यही मूल्यमा आधारित छ। चुनाव नजिकिएको बेलामा मात्र परिवर्तनको कुरा गर्नु पर्याप्त नहुने उनको भनाइ थियो।
खरसाङ निर्वाचन क्षेत्रका उम्मेदवार अमर लामाको प्रशंसा गर्दै थापाले भने, अमर लामा राजनीतिमा दिग्गज व्यक्तित्व हुन् र कोलकातामा पहाडको आवाज बुलन्द पार्न सक्षम छन्। “यो कुरा हामी गर्वका साथ भन्न सक्छौं,” उनले थपे।
चियाबगान श्रमिकहरूको मुद्दालाई केन्द्रमा राख्दै थापाले भने, आजसम्म श्रमिकहरूको समस्या विधानसभामा प्रभावकारी रूपमा उठाउन सक्ने विधायक पहाडले पाउन सकेको थिएन। “श्रमिकको मुद्दा पहाडको सडकमा कराएर हुँदैन, त्यसलाई विधानसभाको भित्तासम्म पुर्याउनुपर्छ,” उनले जोड दिए। अमर लामा त्यही काम गर्ने माध्यम बन्ने दाबी गर्दै उनले चियाबगानका मतदातालाई लामालाई मत दिन आग्रह गरे। थापाले यो पनि उल्लेख गरे, यसपालि पहाडले दिग्गज र योग्य व्यक्तिहरूलाई आफ्नो प्रतिनिधि बनाएर कोलकाता पठाएको छ भन्ने कुरा बंगालले पनि महसुस गर्नेछ।