वेलिंगटन: अलराउण्डर क्यामरन ग्रीन (अविजित १७४)-को उत्कृष्ट ब्याटिंगपछि स्पिनर न्याथन लियोनको विध्वंशी बलिंगको सहायताले न्यूजील्याण्ड विरुद्ध पहिलो क्रिकेट टेस्ट म्याचमा अष्ट्रेलिया जीतको गोरेटोमा अग्रसर भयो। शुक्रवार म्याचको दोस्रो दिन अष्ट्रेलियाको पहिलो ईनिंग्स ३८३ रनमा समाप्त भयो। त्यसपछि न्यूजील्याण्डको पहिलो ईनिंग्स केवल १७९ रनमा समाप्त हुँदा अष्ट्रेलियाले पहिलो ईनिंग्सको आधारमा २०४ रनको बढ़त हासिल गऱ्यो। त्यसपछि अष्ट्रेलियाले दोस्रो दिनको खेल समाप्त हुँदासम्म आफ्नो दोस्रो ईनिंग्समा २ विकेट गुमाएर १३ रन बनायो। यसरी अष्ट्रेलियासँग अहिले समग्रमा २१७ रनको बढ़त रहेको छ। आज दिनको खेल समाप्त हुँदासम्म उस्मान ख्वाजा ५ र नाइट वचम्यान-को रूपमा ओर्लिने न्याथन ६ रनमा अविजित थिए।
आज अष्ट्रेलियाले पहिलो दिनको स्कोर ९ विकेटमा २७९ रनदेखि अघि खेल्दै आफ्नो पहिलो ईनिंग्समा अझ १०४ रन थप्यो। बिहीवार १०३ रनमा अविजित रहने ग्रीन आज १७४ रन बनाएर अविजित रहे। उनले २७५ बल खेलेर २३ वटा चौकार ५ वटा छक्का लगाए। उनका साथी जोश हेजलवुड आज २२ रन बनाएर अन्तिम विकेटको रूपमा आउट भए। ग्रीन र हेजलवुडले अन्तिम विकेटको निम्ति ११६ रनको महत्त्वपूर्ण पार्टनरशीप गरे। न्यूजील्याण्डका बलरहरूमा म्याट हेनरीले सर्वाधिक ५ विकेट लिए। त्यसपछि न्यूजील्याण्डको पहिलो ईनिंग्समा शुरुवात भयावह रह्यो अनि केवल २९ रनमा शीर्ष ५ विकेटको पतन भइसकेको थियो। त्यहाँबाट ग्लेन फिलिप्सले ७१ रन बनाएर टीमलाई हेर्न लायकको स्कोरसम्म पुऱ्याए। फिलिप्सले ७० बल खेलेर १३ वटा चौका लगाए। उनले टम ब्लण्डेल (३३ रन)-सँग मिलेर छैटौं विकेटको निम्ति ८४ रन अनि म्याट हेनरी (४२ रन)-सँग मिलेर आठौं विकेटको निम्ति ४८ रनको पार्टनरशीप गरे। हेनरीले ३४ बल खेलेर ४ वटा छक्का र ३ वटा चौका लगाए। न्यूजील्याण्डको शीर्ष क्रममा टम लाथमले ५ र विल यंगले ९ र डेरिल मिचेलले ११ रन बनाए। यसबाहेक केन विलियम्सन र रचिन रविन्द्रले त खाता पनि खोल्न सकेनन्। अष्ट्रेलियाई बलरहरूमा स्पिनर न्याथन लियोनले सर्वाधिक ४ विकेट लिए।