​नक्सलबाडी: नक्सलबाडी क्षेत्रमा एउटा निन्दनीय र संवेदनशील घटना सार्वजनिक भएको छ, जहाँ एक नाबालिकामाथि यौन दुर्व्यवहार गरेको आरोपमा पुलिसले एक पसल सञ्चालकलाई पक्राउ गरेको छ। पक्राउ पर्ने आरोपीको पहिचान तारित घोषको रूपमा गरिएको छ। आइतबार भएको यस घटनाले स्थानीय क्षेत्रमा ठूलो आक्रोश पैदा गरेको छ भने पीडित परिवारको लिखित उजुरीका आधारमा पुलिसले तत्काल कदम चाल्दै आरोपीलाई नियन्त्रणमा लिएको हो।
​प्रहरी स्रोतका अनुसार पीडित नाबालिका आइतबार कस्मेटिक्स (सौन्दर्य सामग्री) किन्न स्थानीय एउटा दाेकानमा गएकी थिइन्। सोही क्रममा पसल सञ्चालक घोषले ती नाबालिकालाई पसलमा एक्लै भेट्टाएपछि उनीसँग अनुचित तथा अश्लील व्यवहार गरेको आरोप लागेको छ। घटनालगत्तै त्रसित बनेकी नाबालिका रुँदै घर फर्किइन् र आफ्नो परिवारलाई आफूमाथि भएको दुर्व्यवहारको बारेमा बेलिविस्तार लगाइन्। घटना थाहा पाएलगत्तै आक्रोशित बनेको परिवारले आइतबार अबेर साँझ नक्सलबाडी थाना पुगेर आरोपी विरुद्ध लिखित उजुरी दर्ता गराएको थियो।
​पीडित परिवारको उजुरी प्राप्त हुनासाथ नक्सलबाडी थाना पुलिसले तदारुकता देखाउँदै आरोपी तारित घोषलाई तत्कालै पक्राउ गरेको हो। पुलिसले यस मामिलालाई गम्भीरताका साथ लिँदै आरोपी विरुद्ध बाल यौन दुर्व्यवहार विरुद्धको कडा कानुन अर्थात् पोक्सो ऐन अन्तर्गत मुद्दा दर्ता गरी कानुनी प्रक्रिया अगाडि बढाएको छ। पक्राउ परेका आरोपी घोषलाई सोमबार थप कानुनी कारबाही र प्रहरी हिरासतका लागि सिलगढी अदालतमा पेस गरिएको पुलिसले जनाएको छ।