नयाँ दिल्ली: भारतका प्रधानमन्त्री नरेन्द्र मोदी ले भारतीय राजनीतिमा नयाँ इतिहास रचेका छन्। उनी देशमा सबैभन्दा लामो समयसम्म सरकार प्रमुखको रूपमा कार्य गर्ने नेता बनेका छन्। उनले सिक्किमका पूर्व मुख्यमन्त्री पवन कुमार चामलिङ को रेकर्ड तोडेका हुन्।
उपलब्ध विवरणअनुसार चामलिङले ८,९३० दिनसम्म मुख्यमन्त्रीको रूपमा कार्य गरेका थिए भने मोदीले गुजरातका मुख्यमन्त्री र प्रधानमन्त्रीका रूपमा बिताएको समय जोड्दा ८,९३१ दिन पूरा गरेका छन्। यससँगै उनले निरन्तर सार्वजनिक सेवामा नयाँ कीर्तिमान कायम गरेका छन्।
मोदीले यसअघि गुजरातका सबैभन्दा लामो समयसम्म मुख्यमन्त्री रहने रेकर्ड पनि बनाएका थिए। उनी लामो अनुभव भएका प्रधानमन्त्रीका रूपमा पनि चिनिन्छन्।
त्यस्तै, उनी सन् २०१४, २०१९ र २०२४ का लोकसभा चुनाव लगातार जित्ने पहिलो गैर-कांग्रेस प्रधानमन्त्री समेत बनेका छन्।
सन् १९५० मा गुजरातमा जन्मिएका मोदीले आफ्नो राजनीतिक यात्रा राष्ट्रीय स्वयंसेवक संघ (आरएसएस) बाट सुरु गरेका थिए। सन् १९८५ मा भारतीय जनता पार्टीमा प्रवेश गरेपछि उनले संगठन र नेतृत्व दुवै क्षेत्रमा सक्रिय भूमिका खेलेका थिए।