मुम्बई: बलिउडका चर्चित फिल्ममध्ये एक ‘धुरन्धर 2’ ले रिलिज हुनुअघि नै बक्स अफिसमा ठूलो हलचल मच्चाएको छ। आदित्य धरको निर्देशनमा बनेको यो स्पाई थ्रिलर दर्शकमाझ निकै चर्चामा छ।
फिल्ममा रणवीर सिंह फेरि आफ्नो चर्चित भूमिकामा देखिएका छन् भने राधा मोहन, अर्जुन रामपाल र संजय दत्त जस्ता कलाकार पनि प्रमुख भूमिकामा छन्। साथै यामी गौतमको क्यामियो पनि फिल्मको विशेष आकर्षण बनेको छ।
बुधबार भएको पेड प्रिभ्युबाट फिल्मले करिब ४४ करोड रुपैयाँ कमाइ गरेको छ। ओपनिङ डेमा भने ६० देखि ७० करोड रुपैयाँसम्म कमाइ हुने अनुमान गरिएको छ। करिब १० हजार शोका साथ यसलाई बलिउडको सबैभन्दा ठूलो प्रिमियर रिलिज मानिएको छ।
फिल्मको पहिलो भाग (५ डिसेम्बर २०२५) ले १३०० करोड रुपैयाँ कमाइ गर्दै ब्लकबस्टर सफलता हासिल गरेको थियो, जसका कारण यसको सिक्वेललाई लिएर ठूलो अपेक्षा गरिएको छ।
एडभान्स बुकिङले रिलिजअघि नै धेरै रेकर्ड तोडेको छ। यद्यपि पेड प्रिभ्युका क्रममा केही प्राविधिक समस्या पनि देखिएका छन्। मुम्बई, दिल्ली र कोलकातामा केही शो प्रभावित भएका थिए। साथै मलायालम र कन्नड संस्करणका शो बिहीबारसम्मका लागि स्थगित गरिएको छ भने तमिल र तेलुगु भर्सनमा पनि ढिलाइ भएको छ।
फिल्म जेआईओ स्टुडियोज र बी६२ स्टुडियोजले निर्माण गरेका हुन्।
अब सबैको नजर फिल्मको पहिलो सप्ताहन्तको कमाइमा छ, जसले २०२६ मा बक्स अफिसको वास्तविक बादशाह को हुनेछ भन्ने निर्धारण गर्नेछ।