गान्तोक: युवाहरूलाई सशक्तिकरण गर्ने उद्देश्यसहित १८औँ रोजगार मेला देशभरका ४५ स्थानमा एकैसाथ आयोजना गरिएको छ। मेलामार्फत विभिन्न सरकारी विभाग तथा सङ्गठनहरूमा नियुक्त भएका ६१ हजारभन्दा बढी युवालाई नियुक्ति पत्र हस्तान्तरण गरिएको छ।
यसै क्रममा गान्तोकस्थित आईटीबीपी सेक्टर मुख्यालयमा आयोजित रोजगार मेलामा ८० जना नवनियुक्त युवाले नियुक्ति पत्र प्राप्त गरेका छन्। ती नियुक्तिहरूमा सिक्किमका ३७, पश्चिम बङ्गालका ४२ र बिहारका १ जना उम्मेदवार सामेल रहेका छन्। उनीहरू सीआरपीएफ (५३), एसबीआई (३), आईटीबीपी (१३), एसएसबी (७), बीएसएफ (३) र असम राइफल्स (१) मा सेवा प्रवेश गर्ने पीआईबीले जनाएको छ।
कार्यक्रमका प्रमुख अतिथि आईटीबीपी सेक्टर मुख्यालय, गान्तोकका डीआईजी सञ्जीव कुमार सिंहले नवनियुक्त उम्मेदवारहरूलाई समर्पण, इमान्दारिता र प्रतिबद्धताका साथ राष्ट्रको सेवा गर्न आग्रह गरे। उनले युवाहरूका लागि राष्ट्र निर्माणमा योगदान दिने यो सुनौलो अवसर भएको उल्लेख गर्दै, युवालाई देशसेवातर्फ आकर्षित गर्न हरेक वर्ष रोजगार मेला आयोजना गरेकोमा भारत सरकारप्रति आभार व्यक्त गरे।
कार्यक्रममा प्रधानमन्त्री नरेन्द्र मोदीको १८औँ रोजगार मेलासम्बन्धी सम्बोधनको प्रत्यक्ष प्रसारण पनि गरिएको थियो। सो अवसरमा डीआईजी सिंह तथा अन्य विशिष्ट व्यक्तिहरूले उम्मेदवारहरूलाई नियुक्ति पत्र हस्तान्तरण गरे, जसलाई उनीहरूको करियरको एक महत्वपूर्ण माइलखुट्टीका रूपमा लिइएको छ। समारोहमा आईटीबीपी, एसएसबी, सीआरपीएफ र एसबीआईका वरिष्ठ अधिकारीहरूको उपस्थिति रहेको थियो।
प्रधानमन्त्रीको रोजगार सिर्जनालाई सर्वोच्च प्राथमिकता दिने प्रतिबद्धताअनुसार रोजगार मेला एक प्रमुख पहलका रूपमा अघि बढाइएको हो। यसको सुरुवातदेखि हालसम्म देशभर आयोजित रोजगार मेलामार्फत ११ लाखभन्दा बढी भर्ती पत्र वितरण भइसकेको पीआईबीले जनाएको छ।