सिलगढी: ७० औं सगरमाथा विजय दिवस र तेन्जिङ नोर्गे शेर्पाको १०९ औँ जन्मजयन्ती सिलगढी नगर निगम र वातावरण प्रेमि संस्था एनएएफ द्वारा मनाइयो। सो अवसरमा दार्जिलिङको पालोमा नगरपालिकाले एक कार्यक्रमको आयोजना गरेको थियो। सिलगढी नगर निगमका मेयर गौतम देवले सोमबार बिहान सिलगढीको दार्जिलिङ मोडमा तेन्जिङ नोर्गे शेर्पाको शालिकमा पुष्पहार अर्पण गरे।

तेन्जिङ नोर्गे शेर्पाको प्रतिमामा नगरपालिका अध्यक्ष प्रतुल चक्रवर्ती, उपमेयर रञ्जन सरकारलगायत नगरपालिकाका पदाधिकारीले माल्यार्पण गरी श्रद्धाञ्जली अर्पण गरेका थिए। कार्यक्रमलाई सम्बोधन गर्दै मेयरले तेन्जिङ नोर्गे शेर्पालाई भारत रत्नबाट सम्मान गर्ने माग फेरि उठाए।