दार्जीलिङ: राइजिंग स्टार स्पोर्टिंग क्लब, फेञ्चेटारको तत्त्वावधानमा आयोजित बिशाल सेंगदेन स्मृति दिपावली कप नक्आउट फूटबल टुर्नामेण्टको १५औं संस्करणमा डीएफसी दार्जीलिङले रोमाञ्चक जीतको साथ क्वार्टर फाइनलमा स्थान बनायो। फेञ्चेटार खेल मैदान (दार्जीलिङ)-मा शनिवार भएको म्याचमा डीएफसी (डायमण्ड फूटबल क्लब) दार्जीलिङले फुञ्चोलिंग हीरोज क्लब (भूटान)-विरुद्ध ४-३-ले जीत हासिल गऱ्यो। विजेता टीमबाट अनिरुप सुब्बाले २ गोल गरे। यसबाहेक सुजन लामा र अजनिश राईले १-१ गोल गरे। यसरी भूटानको टीमबाट अभि थापा, जिग्मी वांगचुक र एड्रिन तिग्गाले १-१ गोल गरे। सुजन लामालाई प्लेयर अव् द म्याच चयन गरियो। यस टुर्नामेण्टमा जम्मा १६ वटा अग्रणी टीमहरूले हिस्सा लिएको छ। टुर्नामेण्टको दुईवटा सेमिफाइनल म्याच ३० र ३१ अक्टोबरमा हुनेछ। यसरी फाइनल ८ नोभेम्बरमा खेलिनेछ। यस सेभेन ए साइड फूटबल टुर्नामेण्टमा च्याम्पियन हुने टीमलाई आकर्षक ट्रफीको साथमा २.५० लाख रुपियाँको नगद पुरस्कार प्रदान गरिनेछ। यसरी नै रनरअप् हुने टीमलाई आकर्षक ट्रफीको साथमा १.५० लाख रुपियाँको नगद पुरस्कार प्रदान गरिने आयोजक राइजिंग स्टार स्पोर्टिंग क्लबको पक्षमा बिनोद छेत्रीले बताएका छन्।