नयाँ दिल्ली: एयर इण्डिया र एयर इण्डिया एक्सप्रेस एयरलाइन्सले अचानक आफ्ना ७८ उडानहरू रद्द गरेका छन्। यसको कारण कर्मचारी अभाव रहेको बताइएको छ। एयरलाइन्सका सबै चालक दलका सदस्यहरू सामूहिक बिरामी बिदामा गएका छन्। त्यसपछि कम्पनीले उडान रद्द गरेको घोषणा गरेको थियो। स्रोतका अनुसार यी कर्मचारीले बिदाको सूचना समेत दिएका छैनन्। सञ्चारमध्यमको समाचारअनुसार, एयर इण्डिया एक्सप्रेसबाट प्राप्त जानकारी अनुसार वरिष्ठ चालक दलका सदस्यहरु बिना सूचना अचानक बिदामा गएकाले धेरै अन्तर्राष्ट्रिय र आन्तरिक उडान प्रभावित भएका छन्। मंगलबार रातिदेखि यो आन्दोलनले चर्को रुप लिएको छ। जसका कारण एयरलाइन्सले ७८ भन्दा बढी उडान रद्द गर्नुपर्यो। यीमध्ये धेरैजसो उडान मध्यपूर्व र खाडी मुलुकका लागि हुन्। साथै धेरै उडानहरू ढिलो चलिरहेका छन्। एयर इण्डिया र एयर इण्डिया एक्सप्रेस मर्ज हुन लागेका छन्। जसका कारण दुवै एयरलाइन्सका पाइलट र केबिन क्रूले आफ्नो जागिर खतरामा परेको महसुस गरेका छन्।

एयर इण्डिया एक्सप्रेसले एक विज्ञप्ति जारी गर्दै भन्यो, ‘हाम्रो वरिष्ठ केबिन क्रूको एक खण्डले हिजो रातीदेखि अन्तिम मिनेटमा बिरामी भएको रिपोर्ट गरेको छ, जसको परिणामस्वरूप उडान ढिलाइ र धेरै रद्द भएको छ। हामी यी घटनाहरूको पछाडि कारणहरू बुझ्न क्रु सदस्यहरूसँग कुरा गर्दैछौं। साथै, यात्रुलाई पर्नसक्ने असुविधा कम गर्नका लागि हाम्रा टोलीहरू तीव्र गतिमा काम गरिरहेका छन्, नागरिक उड्डयन प्राधिकरणले यस विषयमा अनुसन्धान गरिरहेको छ।‘ एयरलाइन्सले प्रभावित यात्रुहरूलाई पूर्ण रकम फिर्ता दिइने वा उनीहरूसँग अर्को मितिमा आफ्नो उडान पुन: तालिका गर्ने विकल्प रहेको बताएको छ। एयर इण्डिया एक्सप्रेसले यात्रुहरूलाई एयरपोर्टमा जानुअघि आफ्नो उडानको स्थिति जाँच गर्न सल्लाह दिएको छ।