नयाँ दिल्ली: टी२० वर्ल्ड कप २०२६-को समापन भइसकेको छ। सह-आयोजक श्रीलंकाको निम्ति यो टुर्नामेण्ट निराशाले भरिएको रह्यो। टीमका मुख्य प्रशिक्षक सनथ जयसूर्याले पनि खराब प्रदर्शनले गर्दा पदबाट राजीनामा दिइसकेका छन्। अहिले श्रीलंका क्रिकेट (एसएलसी)-ले पूर्व दक्षिण अफ्रिकी क्रिकेटर तथा अनुभवी प्रशिक्षक ग्यारी कर्स्टनलाई श्रीलंका पुरुष क्रिकेट टीमको मुख्य प्रशिक्षक नियुक्त गरिएको घोषणा गरेको छ। कर्स्टनको कार्यकाल १५ अप्रेलदेखि शुरु भएर १४ अप्रेल २०२८-सम्म रहनेछ। एसएलसी-ले बताएअनुसार, कर्स्टनको मुख्य लक्ष्य टीमलाई आईसीसी पुरुष वनडे वर्ल्ड कप २०२७-को निम्ति तयार गर्ने हुनेछ। यस टुर्नामेण्टको आयोजन दक्षिण अफ्रिका, जिम्बाब्वे र नामीबियामा हुनेछ। बोर्डले यो नियुक्ति राष्ट्रिय हाई परफर्मेन्स सेण्टरको संरचनालाई मजबूत गर्ने अनि आउँदो ठूलो अन्तर्राष्ट्रिय टुर्नामेण्टहरूको निम्ति टीमलाई असल बनाउने रणनीतिको हिस्सा रहेको जानकारी दिएको छ। ५८ वर्षीय कर्स्टनसँग अन्तर्राष्ट्रिय कोचिंगको लामो अनुभव रहेको छ। उनले २००८-देखि २०११-बीच भारतीय टीमलाई प्रशिक्षण दिएका थिए अनि उनकै मार्गदर्शनमा भारतले २०११-मा वनडे वर्ल्ड कप खिताब जितेको थियो। त्यसपछि कर्स्टन २०११-देखि २०१३-सम्म दक्षिण अफ्रिकाको पनि मुख्य प्रशिक्षक रहे। उनको कार्यकालमा दक्षिण अफ्रिका तीनैवटा प्रारूपमा नम्बर १ टीम बनेको थियो। उनले पाकिस्तानी टीमसँग पनि केही समय काम गरेका थिए अनि हालै उनी क्रिकेट नामीबियासँग सल्लाहकारको रूपमा जोड़िएका थिए। उल्लेखनीय छ, जयसूर्याले २०२४ टी२० वर्ल्ड कपको तुरन्त पछि श्रीलंकाई टीममा मुख्य प्रशिक्षक पद सम्हालेका थिए। उनको कार्यकालको शुरुवाती महिनाहरूमा टीमले केही महत्त्वपूर्ण उपलब्धिहरू हासिल गरेको थियो। अगस्त २०२४-मा श्रीलंकाले २७ सालपछि भारतविरुद्ध द्विपक्षीय सीरीज जितेको थियो। यस वर्ष श्रीलंकाले घरेलु मैदानमा न्यूजील्याण्डलाई टेस्ट सीरीजमा २-०-ले पराजित गरेको थियो। जयसूर्याको कार्यकालको अन्तिम साल चाहिँ निराशाजनक रह्यो। टी२० वर्ल्ड कपमा श्रीलंकाले लगातार ४ वटा म्याचमा हारको सामना गर्नु पऱ्यो अनि टीम टुर्नामेण्टबाट बाहिर भयो। २०२५ एशिया कपमा पनि टीमको प्रदर्शन साधारण रह्यो। टी२० वर्ल्ड कपको ठीक अघि पनि ईंग्ल्याण्डले श्रीलंकाविरुद्ध टी२० सीरीज ३-०-ले क्लीन स्वीप गरेको थियो। जयसूर्याले यसअघि २ वटा अलग-अलग कार्यकालमा श्रीलंकाको मुख्य चयनकर्ताको रूपमा पनि जिम्मेवारी निर्वाह गरिसकेका छन्।