खरसाङ: खरसाङका‌ समाजसेवी तथा विभिन्न क्षेत्रमा सक्रिय रुपमा कार्य गरेका विशिष्ट व्यक्ति दुर्गासिंह छेत्रीको निधनमा खरसाङमा विभिन्न संघ संस्थाहरुद्वारा सामुहिक शोक सभाको आयोजना गरिएको छ। खरसाङको गोर्खा जनपुस्तकालय भवनमा सम्पन्न भएको उक्त शोक सभाको अध्यक्षता गोर्खा जनपुस्तकालय खरसाङको सभापति रबीनकुमार प्रधानले गरेका थिए भने शोक सभालाई पुस्तकालयको उपाध्यक्ष प्रकाश प्रधान र मूल सचिव विनोद रसाइलीले सञ्चालन गरेका थिए‌। सभाको शुरुमा खरसाङका विभिन्न संघ संस्थाहरुका अध्यक्षहरुका बाहुलीबाट समाजसेवी दुर्गासिंह छेत्रीको तस्वीरमा द्वीप प्रज्वलन गरेर श्रध्दाञ्जली अर्पण गरेका थिए भने उपस्थित विभिन्न संघ संस्थाहरुका प्रतिनिधिहरुले‌ पनि उनलाई श्रध्दाञ्जली अर्पण गरेका थिए‌। त्यसपछि उनको आत्मा शान्तिको लागि एक मिनटको मौन प्रार्थना पनि गरिएको थियो। उक्त शोक सभामा ओम शान्ति मन्त्र पाठ पुस्तकालयको पूर्व सचिव एंव पण्डित पुरूषोत्तम अधिकारीले‌ पठन गरेका थिए। यस शोक सभामा समाजसेवी दुर्गासिंह छेत्री विषयमा खरसाङका विभिन्न संघ संस्थाहरुका प्रतिनिधिहरुले‌ वक्तव्य राखेका थिए। यस क्रममा गोर्खा जनपुस्तकालय खरसाङको तर्फबाट पूर्व सभापति एवं वरिष्ठ सदस्य साथै समाजसेवी तिलक शर्मा, जागृति परिवारको तर्फबाट संस्थापक पूर्ण गुरुङ ‘निरुपम’, गोर्खा सांस्कृतिक संस्थान् खरसाङको तर्फबाट अध्यक्षा आशा मुखिया लामा, खरसाङ महकुमा खेलकूद संघको तर्फबाट सचिव निर्मल गुरुङ, भारतीय गोर्खा परिसंघको‌ तर्फबाट खरसाङ क्षेत्रीय समितिको सचिव लक्ष्मण शर्मा, शिक्षकहरुको तर्फबाट डेभिस प्राथमिक पाठशालाका‌ पूर्व प्रधान अध्यापक ऋषि राई, डेभिस प्राथमिक पाठशालाका‌ वर्तमान प्रधान अध्यापक साथै शतवार्षिकी समारोह समितिको सचिव सन्तोषसिंह लकान्द्री, परिवार पक्षबाट भाइ बीबी छेत्रीले वक्तव्य राखेका थिए। सभामा वक्ताहरुले आफ्नोे आफ्नो संस्थामा दुर्गासिंह छेत्रीले दिएको योगदानको उल्लेख गर्दै उनी विषयमा विभिन्न पक्षहरु विषयमा बताएका थिए। वक्ताहरुले दुर्गासिंह छेत्री अब्बल दर्जाको खेलाडी रहेको, राजनीतिज्ञ, शिक्षा, खेलकूद, साहित्य, संस्कृति र विभिन्न क्षेत्रमा दिएको योगदान विषयमा बताएका थिए। वक्ताहरुले दुर्गासिंह छेत्रीको निधनले‌ खरसाङ क्षेत्रका संघ संस्थाहरुलाई अपूरणीय क्षति भएको बताउँदै श्रध्दाञ्जली अर्पण गरेका थिए। उल्लेखनीय छ समाजसेवी तथा विशिष्ट व्यक्ति दुर्गासिंह छेत्रीको गत २८ अगस्तको दिन दिल्लीमा निधन भएको थियो।‌ उनको निधनले‌ खरसाङ क्षेत्रका विभिन्न संघ संस्थाहरुलाई ठूलो क्षति भएको बताइएको छ।