कोलकाता: लोकसभा चुनाव २०२४ को सन्दर्भमा जारी गरिएको एक्जिट पोलले मोदी सरकारका लागि खुशीको खबर ल्याएको छ। अब एक्जिट पोललाई लिएर मुख्यमन्त्री ममता ब्यानर्जीको भनाइ अघि आएको छ। उनले सर्वेक्षणलाई ‘फर्जी’भनेकी छन्। उनले पार्टीका कार्यकर्ताहरूलाई बलियो रहन सल्लाह दिइन्। एक अन्तर्वार्तामा उनले भनिन्, ‘हाम्रो राज्यको बारेमा एक्जिट पोलमा के देखाइएको छ मलाई विश्वास लाग्दैन। यो बिल्कुल फर्जी छ।‘ शनिबार अन्तिम चरणको मतदान पछि, धेरै एक्जिट पोल सर्वेक्षणहरूले भाजपालाई बंगालको सबैभन्दा ठूलो पार्टी घोषित गरेका छन्। मुख्यमन्त्री ममता ब्यानर्जीले ती सबै सर्वेक्षणलाई फर्जी घोषणा गरिन्। उनले भनिन्, ‘मिडियाले कसरी भनिरहेको छ, कसले कुन सिट जित्छ र कति पैसामा? म यो मिडिया सर्वेक्षण स्वीकार गर्दिन।‘ उनले पार्टीका कार्यकर्ताहरूलाई मतगणनाको दिन बलियो र सतर्क रहन बताइन्। उनले भनिन्, ‘टीएमसीले मिडियाले देखाएको भन्दा दोब्बर सिट जित्नेछ।‘

राज्यमा सत्तारुढ दलको सम्भावित सिट संख्याका बारेमा मुख्यमन्त्रीले भनिन्, ‘म कुनै संख्यामा जान्दिन, तर एउटा कुरा भन्नसक्छु, हामीले तल्लो तहमा जसरी काम गर्‍यौं, जनतासँग कुरा गर्‍यौं, जनताले हामीलाई भोट दिँदैनन् भन्ने मैले कहिल्यै सोचेको थिइनँ।‘ उनले अझ भनिन्, ‘पहिला नतिजा हेर्छु। नतिजा हेरेपछि हिसाब गर्छु। हामीसँग पनि आंकडा छ। हामी सकेसम्म धेरै क्षेत्रीय दलहरूलाई हामीसँग समावेश गर्ने प्रयास गर्नेछौं। यसैबीच, म ती मानिसहरूलाई बताउन चाहन्छु जो यस पटक मोदीजीलाई जिताउन खोजिरहेका छन्, तिनीहरू यति सजिलै पार गर्नसक्ने छैनन्। यो सरकार कति दिन टिक्ने भन्नेमा शंका छ।‘ यसपछि मुख्यमन्त्री ममता ब्यानर्जीले मिडियामा नै प्रश्न उठाइन्। उनले एक्जिट पोललाई लिएर मिडियालाई निशाना बनाउँदै भने, ‘यस्तो लाजहीन मिडिया मैले कहिल्यै देखेको छैन। उनीहरुले यो सिटमा विपक्षीहरु हारेका छन्, त्यो सिटमा हारेको पनि भनिरहेका छन्। के यसको मतलब उसले भाजपाबाट पैसा लिएको हो? नतिजा आउनुअघि कसरी थाहा हुन्छ कसले कुन सिटमा हार्यो?’