बिर्तामोड़ :नेपाली चलचित्र ‘ऊनको स्वीटर’ले भारतमा सफल प्रदर्शनको ५१औं दिन पूरा गर्दै ऐतिहासिक उपलब्धि हासिल गरेको छ । भारतभर चालीसवटा हलमा रिलिज भएको यो चलचित्र विभिन्न शहरका ६ वटा हलमा ५१ दिनसम्म निरन्तर प्रदर्शनमा रहेको छ ।

५१ दिनसम्म लगातार प्रदर्शनमा रहेका प्रमुख हलहरूमा चण्डिगढको पिभिआर सेन्ट्रल, लुधियानाको पिभिआर एभोन सिटी मल, सिलिगुडीका आइएनओएक्स सिटी सेन्टर र भेगा सर्कल मल, सिक्किमको आइएनओएक्स वेष्ट पोइन्ट मल तथा लखनउको पिभिआर शहरगञ्ज मल छन् । यी हलहरूमा चलचित्रले निरन्तर दर्शकको साथ पाइरहेको निर्माण पक्षले जनाएको छ।

नेपालमा उल्लेखनीय बक्स अफिस सफलता हासिल गर्दै ५१ दिनसम्म ४० भन्दा बढी हलमा प्रदर्शन भई करिब १२ करोड रुपैयाँ आम्दानी गरेको ‘ऊनको स्वीटर’ले भारतमा पनि सशक्त उपस्थिति जनाएको हो ।

आर्टमान्डू नेपाल प्रा.लि.ले निर्माण गरेको यस चलचित्रको भारत यात्रा सिक्किमको राजधानी गान्तोकमा प्रिमियर शोबाट सुरु भएको थियो । चलचित्रमा विपिन कार्की, मिरूना मगर, एलेक्स पारस, परीक्षा लिम्बु, सुनिल पोखरेललगायतको अभिनय छ । भारतमा ‘ऊनको स्वीटर’लाई एसली प्रोडक्सन र एवन राई समूहले रिलिज गरेका हुन् । भारत प्रदर्शनका क्रममा निर्देशक नवीन चौहानसँगै गायक सुजन चापागाईं लामो समय भारतमै रहनुभएको थियो ।

निर्माण संस्था आर्टमान्डू नेपाल प्रा.लि.ले भारत तथा नेपालभरका दर्शक र साझेदारप्रति आभार व्यक्त गर्दै ‘ऊनको स्वीटर’को अन्तर्राष्ट्रिय यात्राले नेपाली चलचित्रलाई नयाँ बजार र पहिचान दिलाएको विश्वास व्यक्त गरेको छ ।