मुम्बई: विक्की कौशल र यामी गौतम अभिनीत फिल्म ‘उरी: द सर्जिकल स्ट्राइक’ ले शनिबार आफ्नो प्रदर्शनको ६ वर्ष पूरा गरेको छ। फिल्ममा काम गरेका दिनहरूको सम्झना गर्दै यामीले इन्स्टाग्राममा पुराना यादहरू सेयर गर्दै एक भावुक नोट लेखेकी छिन्। उनले लेखेकी छिन्, “उरी: द सर्जिकल स्ट्राइकले हाम्रो कल्पनाभन्दा परको उत्सव मनायोl  भारतीय सेनाको वीरता, राष्ट्रको भावना र सिनेमाको शक्ति। यस्तो अनमोल परियोजनाको हिस्सा बन्न पाउनु मेरो लागि सम्मानको कुरा थियो, जसको उत्सव अझै पनि मनाइन्छ। पल्लवी शर्माको भूमिका मेरो लागि सपना पूरा भएको जस्तो थियो। यति अद्भुत महिला पात्र निभाउन पाउनु साँच्चिकै एउटा वरदान हो। तपाईंहरूको माया र यो चमत्कार बनाउन मद्दत गर्ने सम्पूर्ण टिमप्रति धेरै आभारी छु।” यामीका श्रीमान् आदित्य धरले ‘उरी’ को निर्देशन गरेका थिए। त्यो समयमा उनीहरूको विवाह भएको थिएन। यो फिल्म २०१६ को सेप्टेम्बरमा पाकिस्तान अधीन कश्मीर (पीओके) मा आतंकवादी अड्डाहरूमा भारतीय सेनाले गरेको सर्जिकल स्ट्राइकको सत्य घटनामा आधारित छ। फिल्ममा परेश रावल, कीर्ति कुल्हारी र मोहित रैना जस्ता कलाकारहरूको पनि महत्त्वपूर्ण भूमिका छ।