लण्डन: ईंग्लिश प्रीमियर लीग फूटबलमा म्यानचेष्टर युनाइटेड र टोटनह्याम जीतको फर्ममा फर्किए पनि आर्सनलले निराशाजनक हारको सामना गर्नु पऱ्यो। शनिवार राति खेलिएको म्याचमा आर्सनललाई बोर्नमाउथले २-०-ले पराजित गऱ्यो। आफ्नो होम ग्राउण्ड भाइटलिटी स्टेडियममा ४८ प्रतिशत पोजेशनको साथ खेल्ने बोर्नमाउथले दुवै गोल दोस्रो हाफको खेलमा हासिल गऱ्यो। यसबीच डिफेण्डर विलियम सालिबाले ३०औं मिनटमा रेड कार्ड देख्दा आर्सनललाई ठूलो धक्का लाग्यो। यसै मौकाको फाइदा उठाउँदै बोर्नमाउथले दोस्रो हाफमा २ गोल गरी म्याच जित्यो। विजेता टीमबाट ऱ्यान क्रिस्टीले ७०औं र जस्टिन क्लुइभर्टले ७९औं मिनटमा गोल गरे। यस म्याचमा हारको साथै आर्सनलले प्रीमियर लीग टेबलको शीर्षमा पुग्ने मौका गुमायो। आर्सनल अहिले ८ वटा म्याचमा १७ पोइण्ट्सको साथ तेस्रो स्थानमा रहेको छ। यसरी दशौं स्थानमा रहने बोर्नमाउथसँग ११ पोइण्ट्स रहेको छ। यसबीच म्यानचेष्टर युनाइटेडले ब्रेण्टफोर्डविरुद्ध २-१-ले जीत हासिल गऱ्यो। आफ्नो होम ग्राउण्ड ओल्ड ट्रेफर्डमा ५१ प्रतिशत पोजेशनको साथ खेल्ने युनाइटेडबाट अलेहान्द्रो गारनाचोले ४७औं र रासमस होलण्डले ६२औं मिनटमा गोल गरे। यसरी ब्रेण्टफोर्डबाट एथान पिनोकले मध्यान्तरको ठीक अघि इञ्ज्युरी टाइमको पाँचौं मिनटमा गोल गरे। यस जीतपछि म्यानचेष्टर युनाइटेड ८ वटा म्याचमा ११ पोइण्ट्सको साथ एघाह्रौं स्थानमा पुग्यो।
यसरी टोटनह्यामले पनि एकतर्फी म्याचमा वेष्ट ह्यामलाई ४-१-ले पराजित गऱ्यो। टोटनह्याम हट्स्पर स्टेडियममा ५७ प्रतिशत पोजेशनको साथ खेल्ने विजेता टीमबाट डेजान कुलुसेवस्कीले ३६औं, य्वेश बिस्सोउमाले ५२औं र सोन ह्यूंग-मिनले ६०औं मिनटमा गोल गरे। एउटा गोल आत्मघाती (अल्फोन्से एरेओला ५५औं मिनट) रह्यो। यसरी वेष्ट ह्यामबाट मोहम्मेद कुडुसले १८औं मिनटमा गोल गरे। वेष्ट ह्यामका गोलदाता कुडुसलाई ८६औं मिनटमा रेड कार्ड देखाइयो। यस जीतपछि टोटनह्याम १३ पोइण्ट्स लिएर सातौं स्थानमा पुग्यो। प्रीमियर लीगका अन्य म्याचहरूमा ब्राइटनले न्यूक्यासललाई १-०-ले, एस्टन भिल्लाले फूलह्यामलाई ३-१-ले अनि एभर्टनले इप्सविच टाउनलाई २-०-ले पराजित गऱ्यो।