वासिङ्टन: इरानसँगको जारी सैन्य द्वन्द्वले संयुक्त राज्य अमेरिकाको युद्ध क्षमतामा गम्भीर चाप पैदा गरेको छ। पेन्टागनको पछिल्लो आन्तरिक प्रतिवेदन र अनुमानहरूका अनुसार अमेरिकी सेनाले आफ्नो सामरिक जखीरामा रहेका हजारौँ महँगा हतियारहरू इरानविरुद्धको कारबाहीमा खर्च गरिसकेको छ। विशेष गरी गत फेब्रुअरी २८ मा इरानले गरेको जवाफी हमलापछि अमेरिकाले आफ्ना ती हतियारहरू ठूलो मात्रामा प्रयोग गर्नुपरेको हो, जुन वास्तवमा चीन र रुस जस्ता महाशक्ति राष्ट्रहरूसँगको सम्भावित भविष्यको युद्धका लागि सुरक्षित राखिएका थिए।
यद्यपि ह्वाइट हाउसले आधिकारिक रूपमा यस संघर्षको कुल लागत सार्वजनिक गरेको छैन, तर विभिन्न रिपोर्टहरूले यो खर्च २८ अर्ब देखि ३५ अर्ब डलरको बीचमा पुगेको दाबी गरेका छन्। यो तथ्यांकले अमेरिकाले प्रतिदिन करिब १ अर्ब डलर युद्धमा खर्च गरिरहेको देखाउँछ। रिपोर्टका अनुसार युद्धको सुरुआती दुई दिनमै सेनाले ५.६ अर्ब डलर बराबरको गोलाबारुद प्रयोग गरेको थियो। न्युयोर्क टाइम्सका अनुसार अमेरिकी सेनाले ६०० माइलभन्दा बढी मारक क्षमता भएका करिब १,१०० वटा ‘जोइन्ट एयर-टु-सर्फेस स्ट्यान्डअफ मिसाइल’ प्रहार गरिसकेको छ, जसको प्रति मिसाइल लागत ११ लाख डलरभन्दा बढी पर्दछ।
यसैगरी अमेरिकाले इरानविरुद्ध १,००० भन्दा बढी टमहक क्रुज मिसाइलहरू प्रहार गरेको छ, जुन उसको वार्षिक खरिद दरको तुलनामा १० गुणा बढी हो। प्रति मिसाइल ३६ लाख डलर पर्ने यस्ता मिसाइलहरू अब अमेरिकासँग करिब ३,००० मात्र बाँकी रहेको बताइएको छ। त्यस्तै, ४० लाख डलरभन्दा महँगो पर्ने १,२०० भन्दा बढी प्याट्रियट इन्टरसेप्टर मिसाइलहरू पनि यो युद्धमा प्रयोग भइसकेका छन्। अचम्मको कुरा त के छ भने, अमेरिकाले सन् २०२५ को पूरा वर्षमा जम्मा ६०० वटा मात्र यस्ता मिसाइल उत्पादन गरेको थियो। यसका साथै १,००० भन्दा बढी प्रिसिजन स्ट्राइक र एटाकम्स (ATACMS) मिसाइलहरूको प्रयोगले अमेरिकी भण्डारलाई चिन्ताजनक अवस्थामा पुर्याएको छ।
रित्तिएको हतियार भण्डारलाई पुनः भर्नका लागि पेन्टागनले अमेरिकी कंग्रेससँग थप बजेटको माग गरेको छ र हाल अनुमति कुरिरहेको छ। यद्यपि, हतियार उत्पादनको वर्तमान सुस्त गतिलाई हेर्दा खर्च भएका हतियारहरूको पूर्ति गर्न कैयौँ वर्ष लाग्न सक्ने सिनेटर ज्याक रिडले चेतावनी दिनुभएको छ। अर्कोतर्फ, ह्वाइट हाउसले भने यी सबै रिपोर्टहरूलाई आधारहीन भन्दै खण्डन गरेको छ। प्रेस सचिव क्यारोलिन लेविटले अमेरिका विश्वकै शक्तिशाली सेना भएको र देशको रक्षाका लागि पर्याप्त हतियार मौज्दात रहेको दाबी गर्नुभएको छ।
About Author
