गान्ताेक: सिक्किमले आग्रा साहसिक र्‍याली २०२६ मा उत्कृष्ट प्रदर्शन गर्दै प्रो दम्पती विधाको उपाधि जित्न सफल भएको छ। इन्कारनेशन स्पोर्ट्स, आग्राद्वारा आयोजित समय–गति–दूरी (टीएसडी) कार तथा मोटरसाइकल र्‍याली मोटरस्पोर्ट्स क्लब अफ आग्रा, जिल्ला प्रशासन आग्रा तथा उत्तर प्रदेश पर्यटन विभागको सहयोगमा सम्पन्न भएको हो।
सिक्किम टोलीकी चालक अन्नपूर्णा एली र नेभिगेटर पुरन तामाङ ले प्रो दम्पती विधामा प्रथम स्थान हासिल गर्दै उपाधि जितेका हुन्।
फेब्रुअरी २० देखि २२ सम्म सञ्चालन भएको र्‍यालीको सुरुवात र समापन आग्रास्थित कोर्टयार्ड बाइ मेरियट आग्रा मा गरिएको थियो। मार्ग झाँसी हुँदै विस्तार गरिएको थियो। प्रतियोगिताको झण्डोत्तोलन प्रख्यात भारतीय र्‍याली चालक सञ्जय तकाले ले गरेका थिए, जो हालका डकार र्‍याली विजेता हुन्।
प्रतियोगिताको अधिकांश भाग निर्धारित मार्गभन्दा बाहिर तथा उत्तर प्रदेश र मध्य प्रदेशका ग्रामीण क्षेत्रका नदी किनार हुँदै सञ्चालन गरिएको थियो, जसले र्‍यालीलाई अत्यन्तै कठिन र चुनौतीपूर्ण बनाएको थियो। देशभरबाट ७० भन्दा बढी प्रतियोगीहरूको सहभागिता रहेको थियो।
अन्य नतिजाअनुसार, दिल्लीका राजितेश माझी र कोलकाताका चन्द्रशीष रायले पुरुष प्रो विधामा उपाधि जिते। गुरुग्रामकी जस्मीत कौर र मुम्बईकी ज्योति अय्यंगार महिला विधामा विजेता बने। आग्रा विधामा बिकाश महाजन र आशिष अग्रवालले शीर्ष स्थान हासिल गरे। विजेताहरूलाई मेरियटमा आयोजित समापन समारोहमा सम्मान गरिएको थियो।

प्रेस विज्ञप्तिअनुसार, आग्रा समय–गति–दूरी र्‍याली देशकै सबैभन्दा कठिन तथा चुनौतीपूर्ण प्रतियोगितामध्ये एक मानिन्छ, जसले तीन दिनमा करिब ७५० किलोमिटर दूरी पार गर्दछ।