गोगामुख: प्रधानमन्त्री नरेन्द्र मोदीले असममा आयोजित चुनावी सभामा भारतीय राष्ट्रिय कांग्रेस माथि कडा आरोप लगाउँदै सत्ता पाए घुसपैठीको संरक्षणका लागि नयाँ कानून ल्याउने बताएका छन्।
गोगामुख मा आयोजित सभालाई सम्बोधन गर्दै उनले कांग्रेसको उद्देश्य बहुसंख्यकलाई अल्पसंख्यकमा बदल्दै स्थायी मतदाता आधार तयार गर्नु रहेको आरोप लगाए। उनले सन् २०१४ अघि कांग्रेसले यस्तै कानून ल्याउने प्रयास गरेको तर राष्ट्रिय जनतान्त्रिक गठबन्धन (राजग) ले त्यसको विरोध गरेको दाबी गरे।
मोदीले कांग्रेसले देशलाई विभाजनतर्फ धकेल्ने प्रयास गरेको आरोप लगाउँदै भीमराव आंबेडकर द्वारा निर्माण गरिएको संविधानको मर्ममाथि आघात पुर्‍याएको बताए।
बिस्वनाथ जिल्ला अन्तर्गत बेहाली मा भएको अर्को सभामा उनले कांग्रेसलाई विकासविरोधी र भ्रष्टाचारको जननीको संज्ञा दिए। उनले असमका स्रोतसाधनको उचित उपयोग नगरेको आरोप पनि लगाए।
प्रधानमन्त्रीले कांग्रेसले घुसपैठीलाई विभिन्न धार्मिक स्थल र जमिनमा बस्न प्रोत्साहित गरी ‘भोट बैंक’ बनाउने प्रयास गरिरहेको आरोप लगाए। उनले भाजपा सरकारले अवैध अतिक्रमण हटाउन कडा कदम चालिरहेको बताए।
असमका १२६ विधानसभा सिटका लागि अप्रिल ९ मा मतदान हुने र मतगणना मे ४ मा हुने निर्वाचन कार्यक्रम तय गरिएको छ।