​वासिङ्टन डीसी: अमेरिकामा आणविक (न्यूक्लियर) र एयरोस्पेस अनुसन्धानमा संलग्न वैज्ञानिकहरूको रहस्यमयी मृत्यु र बेपत्ता हुने शृङ्खलाबद्ध घटनाले सुरक्षा निकायहरूमा हलचल मच्चाएको छ। सङ्घीय अनुसन्धान ब्युरो (एफबीआई) ले हालैका वर्षहरूमा घटेका यस्ता कम्तीमा १० वटा घटनालाई गम्भीरतापूर्वक लिँदै विशेष अनुसन्धान सुरु गरेको छ। रिपोर्टअनुसार एमआईटीका एक प्राध्यापकको आफ्नै घरबाहिर गोली हानी हत्या गरिएको, एक अवकाशप्राप्त वायुसेनाका जनरल बेपत्ता भएको र एक एयरोस्पेस इन्जिनियर ट्रेकिङका क्रममा गायब भएको जस्ता संवेदनशील घटनाहरू यस अनुसन्धानको घेरामा रहेका छन्।
​एफबीआईले यी सबै घटनाहरूका बीच कुनै अदृश्य सम्बन्ध हुन सक्ने आशङ्का व्यक्त गर्दै ऊर्जा विभाग र रक्षा विभागसँग मिलेर सूक्ष्म अध्ययन गरिरहेको छ। यसैबीच, अमेरिकी संसदको हाउस ओभरसाइट कमिटीले पनि यी घटनाहरू राष्ट्रिय सुरक्षाका लागि खतरा बन्न सक्ने भन्दै छुट्टै छानबिनको घोषणा गरेको छ। ह्वाइट हाउसले यसलाई निकै गम्भीरताका साथ नियालिरहेको छ भने पूर्व राष्ट्रपति डोनाल्ड ट्रम्पले समेत यसलाई अत्यन्तै संवेदनशील विषय भन्नुभएको छ। नासाले हालसम्म प्रत्यक्ष सुरक्षा खतरा नदेखिएको स्पष्ट पारे पनि वैज्ञानिक समुदायमा भने त्रास फैलिएको छ। सन् २०२३ मा नासाको जेट प्रोपल्सन ल्याबोरेटरीसँग आवद्ध माइकल डेभिड हिक्सको मृत्युपछि सुरु भएको यो शृङ्खलाले अहिले अमेरिकी राजनीति र सुरक्षा संयन्त्रमा नयाँ बहस सिर्जना गरेको छ।