कोलकाता: उद्योग क्षेत्रका विज्ञहरूले स्थापना गरेको नयाँ व्यावसायिक उद्यम ‘श्रावी नेचुरल्स प्रालि’ ले उपभोक्ता उत्पादनको क्षेत्रमा प्रवेश गरेको छ। पश्चिम बंगालको आर्थिक विकासमा ‘व्यापार सुगमता’ (इज अफ डुइङ बिजनेस) मुख्य प्राथमिकता बनिरहेका बेला कम्पनीले यो कदम चालेको हो।
प्रबन्ध निर्देशक रमेश अग्रवाल र निर्देशक शिवम अग्रवालको नेतृत्वमा रहेको श्रावी नेचुरल्सले ‘पर्सनल केयर’ (व्यक्तिगत हेरचाह) र ‘पूजा एसेंशियल्स’ (पूजा सामग्री) गरी दुई प्रमुख क्षेत्रमा काम सुरु गरेको छ। सात दशकभन्दा लामो इतिहास बोकेको ‘केएमपी’ ब्रान्डलाई नयाँ स्वरूप र आधुनिक दृष्टिकोणसहित बजारमा पुनः प्रस्तुत गर्दै कम्पनीले पर्सनल केयरअन्तर्गत ‘केएमपी ओलिभो बडी आयल’ बजारमा ल्याएको छ।
यसैगरी नरिवल, अमला, ज्यास्मिन, तोरी-अमला र चमेलीका हेयर आयल (कपालको तेल) समेत चरणबद्ध रूपमा विस्तार गर्ने कम्पनीको योजना छ। पूजा सामग्रीतर्फ ‘प्रभा’ र ‘आरती’ ब्रान्डमा दियो बाल्ने तेल तथा घिउ उपलब्ध गराइने कम्पनीले जनाएको छ।
१०० करोड रुपैयाँ लगानीको योजना
श्रावी नेचुरल्सले नयाँ उत्पादन कारखाना (म्यानुफ्याक्चरिङ युनिट), उत्पादन विकास, जनशक्ति व्यवस्थापन, ब्रान्ड निर्माण, बजारीकरण र बजार विस्तारमा करिब १०० करोड रुपैयाँ लगानी गर्ने लक्ष्य राखेको छ। आगामी पाँच वर्षमा ४०० करोड रुपैयाँको कारोबार पुर्याउने महत्वाकांक्षी योजना कम्पनीले अघि सारेको छ।
अनुमानित ६०० करोड रुपैयाँको बडी आयल बजारमा आगामी पाँच वर्षभित्र २० प्रतिशत हिस्सा ओगट्ने लक्ष्य लिइएको छ। हाल ‘केएमपी ओलिभो बडी आयल’ को १०० मिलिलिटरको मूल्य ९५ रुपैयाँ, २०० मिलिलिटरको १७५ रुपैयाँ र ५०० मिलिलिटरको ३२५ रुपैयाँ तोकिएको छ, जसमा सुरुवाती अफरका रूपमा ‘एउटा किन्दा एउटा सित्तैमा’ (बाई वन गेट वन फ्री) योजना समेत लागू गरिएको छ।
क्षेत्रीय विस्तार र रोजगारी
प्रबन्ध निर्देशक रमेश अग्रवालले बढ्दो पर्सनल केयर बजारमा जाडो मौसमलाई लक्षित गर्दै बडी आयलमार्फत बलियो उपस्थिति जनाउन खोजिएको बताउनुभयो। “केएमपीको पहिले नै स्थापित पहिचान र लोकप्रियता छ, त्यसलाई आधुनिक स्वरूपमा अझ सुदृढ बनाउने अवसर हामीले देखेका छौँ,” उहाँले भन्नुभयो।
निर्देशक शिवम अग्रवालले पूजा सामग्रीलाई पनि उत्तिकै महत्वपूर्ण व्यावसायिक क्षेत्रका रूपमा अघि बढाइएको जानकारी दिनुभयो।
“प्रभा र आरती ब्रान्डमार्फत गुणस्तरीय उत्पादन सर्वसुलभ मूल्यमा उपलब्ध गराउँदै दुवै क्षेत्रलाई स्वतन्त्र रूपमा विकास गर्ने हाम्रो लक्ष्य छ,” उहाँले भन्नुभयो।
सुरुवाती चरणमा पश्चिम बंगालका सामान्य पसल तथा आधुनिक खुद्रा बजारमार्फत वितरण विस्तार गरिनेछ। त्यसपछि पश्चिम बंगाल, उत्तर प्रदेश, आसाम, ओडिशा, छत्तीसगढ, बिहार र झारखण्डमा बजार बलियो बनाउँदै आगामी दुई आर्थिक वर्षभित्र उत्तर र पश्चिम भारतमा विस्तार गरिने कम्पनीले जनाएको छ। आगामी आर्थिक वर्षसम्म आफ्नै उत्पादन कारखाना स्थापना गर्ने योजना छ। हाल २०० जना कार्यरत रहेको कम्पनीमा तीन वर्षभित्र कर्मचारी संख्या ५०० पुर्याइनेछ।
दर्शना बानिक ब्रान्ड एम्बासडर
ब्रान्ड प्रवर्द्धन तथा उपभोक्तासँगको पहुँच विस्तारका लागि केएमपीले चर्चित बंगाली अभिनेत्री दर्शना बानिकलाई ब्रान्ड एम्बासडर नियुक्त गरेको छ। मनोरञ्जन क्षेत्रमा बलियो प्रभाव राख्ने दर्शनाको संलग्नताले ब्रान्डको दृश्यता र आधुनिक आकर्षण बढाउन सघाउ पुग्ने अपेक्षा गरिएको छ।





