लण्डन: लिभरपूल ईंग्लिश प्रीमियर लीग फूटबल प्रतियोगितामा जीतको लयमा फर्कियो भने चेल्सीले हारको सामना गर्नु पऱ्यो। यसबीच म्यानचेष्टर युनाइटेड चाहिँ भाग्यले हार्नदेखि बाँच्यो। लिभरपूलले गत म्याचको निराशालाई भुलेर आइतवार राति खेलिएको म्याचमा क्रिष्टल प्यालेसविरुद्ध ३-१-ले जीत हासिल गऱ्यो। यस अवे म्याचमा ४६ प्रतिशत बल पोजेशनको साथ खेल्ने लिभरपूलबाट एलेक्सिस म्याक एलिस्टरले ४०औं, फ्लोरियन विर्त्जले ५४औं र एलेक्जेण्डर इसाकले ८९औं मिनटमा गोल गरे। यसरी क्रिष्टल प्यालेसबाट एडी एन्केतियाहले म्याचको अन्तिम समय (इञ्ज्युरी टाइमको पाँचौं मिनट)-मा गोल गरे। यस जीतको साथ लिभरपूल प्रीमियर लीग अंक तालिकामा १८ अंकको साथ चौथो स्थानमा पुग्यो। यसबीच चेल्सीले चाहिँ सण्डरल्याण्डविरुद्ध ०-१-ले निराशाजनक हारको सामना गर्नु पऱ्यो। आफ्नो घरेलु मैदानमा ३० प्रतिशत बल पोजेशनको साथ खेल्ने सण्डरल्याण्डबाट एञ्जो ले फी-ले ३६औं मिनटमा पेनल्टीबाट गोल गरे। अन्तमा त्यही गोल निर्णायक साबित भयो। यस हारपछि चेल्सी १६ अंकको साथ गोल अन्तरको आधारमा पाँचौं स्थानमा रहन पुग्यो। यसरी १९औं स्थानमा रहने सण्डरल्याण्डसँग ८ अंक रहेको छ।
म्यानचेष्टर युनाइटेडले चाहिँ प्रीमियर लीगको जारी सीजनमा लगातार आठौं म्याचमा जीतको मुख देख्न सकेन। आइतवार राति म्यानचेष्टर युनाइटेड र एस्टन भिल्लाबीच खेलिएको म्याच ४-४-ले ड्र रह्यो। म्याचमा एस्टन भिल्ला एक समय २-०-ले अनि निर्धारित ९० मिनटको खेल सकिँदासम्म ४-२-ले अघि रहेको थियो। घरेलु मैदान ओल्ड ट्रेफर्डमा ५४ प्रतिशत पोजेशनको साथ खेल्ने युनाइटेडले अन्तमा इञ्ज्युरी टाइमको खेलमा लगातार २ गोल गरी म्याच बचायो। इञ्ज्युरी टाइमको खेलमा घरेलु टोलीबाट जोशुआ जिर्कजीले दोस्रो अनि पेट्रिक डोर्गुले छैटौं मिनटमा गोल गरे। यसअघि ब्रुनो फर्नाण्डेसले १६औं र यौरी टेटेमान्सले ४४औं मिनटमा गोल गरे। एस्टन भिल्लाबाट एलिसनले पहिलो, निकोलस ज्याक्सनले चौथो, जन म्याकजिनले ४८औं र लिओन गोरेत्ज्काले ५३औं मिनटमा गोल गरे। एस्टन भिल्ला १३ अंकको साथ १०औं स्थानमा रहेको छ। यसरी १८औं स्थानमा रहने युनाइटेडसँग ८ अंक रहेको छ। प्रीमियर लीगको अन्य एउटा म्याचमा ब्राइटनले १० जना खेलाड़ीमा सीमित ब्रेण्टफोर्डलाई २-०-ले पराजित गऱ्यो। ब्राइटन २२ अंकको साथ दोस्रो स्थानमा रहेको छ।