​सिलगढी: सिलगढीमा आयोजित दार्जिलिङ, कालिम्पोङ, खर्साङ र मिरिक नगरपालिकाका साथै सिलगढी नगर निगमको उच्चस्तरीय प्रशासनिक समीक्षा बैठकमा सहरी सुशासन र जनकल्याणका बहुआयामिक विषयमा व्यापक छलफल भएको छ। पश्चिम बंगालकी नगर विकास तथा नगर मामिला मन्त्री अग्निमित्रा पलको अध्यक्षतामा बैठक सम्पन्न भएको हो।
​बैठकमा सहभागी दार्जिलिङका सांसद् राजु बिष्टका अनुसार, सहरी क्षेत्रका प्रत्येक घरधुरीमा स्वच्छ खानेपानीको पहुँच पुर्‍याउने, आधुनिक ढल (सेवरेज) पूर्वाधार विस्तार गर्ने, स्वास्थ्य र सरसफाइमा सुधार ल्याउने तथा फोहोरमैला व्यवस्थापनलाई प्रभावकारी बनाउने विषयमा विस्तृत समीक्षा गरिएको छ। यसका साथै सहरी क्षेत्रमा बढ्दो ट्राफिक भीडभाड नियन्त्रण गर्ने र ‘प्रधानमन्त्री आवास योजना’को कार्यान्वयनलाई तीव्रता दिने निर्णयसमेत बैठकले गरेको छ।
​सांसद् बिष्टका अनुसार आगामी स्थानीय निकाय चुनाव, नगर प्रशासनका समसामयिक मुद्दा र सर्वसाधारणको जीवनस्तर सुधारका उपायहरूबारे बैठकमा रणनीतिक छलफल भएको छ। दार्जिलिङ, कालिम्पोङ, खर्साङ, मिरिक र सिलगढी तीव्र विकासको गतिमा रहेको उल्लेख गर्दै उनले यी क्षेत्रहरू व्यापार, पर्यटन, शिक्षा, स्वास्थ्य, लजिस्टिक र लगानीका प्रमुख केन्द्र बन्ने ठूलो सम्भावना बोकेको बताए।
​”यी पहाडी तथा तराईका प्रमुख सहरी क्षेत्रको द्रुत विकासलाई व्यवस्थित योजना र आधुनिक पूर्वाधारमार्फत अघि बढाउनु अहिलेको मुख्य आवश्यकता हो,” सांसद् बिष्टले भने।
​मुख्यमन्त्री शुभेन्दु अधिकारीको नेतृत्वमा सरकारले यस सम्पूर्ण क्षेत्रलाई आधुनिक ‘हिमाली पहाडी सहर’ (हिमालयन हिल सिटी) का रूपमा रूपान्तरण गर्ने प्रतिबद्धता जनाएको छ। विकास आयोजनाहरूको समयमै कार्यान्वयन, सहरी पूर्वाधारको सुदृढीकरण र स्वच्छ तथा दिगो सहर निर्माणलाई प्राथमिकतामा राखिएको सांसद् बिष्टले जानकारी दिएका छन्।