राष्ट्र निर्माणमा एनसीसीको योगदानको प्रशंसा
​
नयाँ दिल्ली: ​भारतका उपराष्ट्रपति सी. पी. राधाकृष्णनसमक्ष आज उपराष्ट्रपतिको निवास (उपराष्ट्रपति भवन) मा राष्ट्रिय क्याडेट कोर (एनसीसी) र सैनिक स्कूलहरूका गतिविधि तथा प्रगतिबारे विशेष ब्रिफिङ गरिएको छ। भारतका रक्षा राज्यमन्त्री सञ्जय सेठ र रक्षा मन्त्रालयका वरिष्ठ अधिकारीहरूको टोलीले उपराष्ट्रपति राधाकृष्णनलाई भेटेर यससम्बन्धी विस्तृत जानकारी गराएका हुन्। रक्षा मन्त्रालयका उच्च अधिकारीहरू समेत सम्मिलित यस विशेष बैठकमा देशको युवा शक्तिलाई अनुशासित र राष्ट्रप्रेमी बनाउन सैनिक स्कूल र एनसीसीले खेलिरहेको भूमिकाबारे गहन छलफल भएको थियो।
​ब्रिफिङका क्रममा उपराष्ट्रपति राधाकृष्णनले राष्ट्र निर्माणमा राष्ट्रिय क्याडेट कोर (एनसीसी) ले पुर्‍याउँदै आएको अतुलनीय योगदानको उच्च प्रशंसा गर्नुभयो। उहाँले ‘एक भारत श्रेष्ठ भारत’ अभियान अन्तर्गत सञ्चालित क्याडेट आदानप्रदान कार्यक्रम (क्याडेट एक्सचेन्ज प्रोग्राम) को विशेष चर्चा गर्दै यसलाई राष्ट्रिय एकता र अखण्डतालाई थप सुदृढ बनाउने एक उत्कृष्ट एवं सराहनीय पहलका रूपमा चित्रण गर्नुभयो। यस कार्यक्रमले विभिन्न राज्यका युवाहरूबीच आपसी सद्भाव र सांस्कृतिक आदानप्रदान बढाउन महत्त्वपूर्ण भूमिका खेलेको उहाँको भनाइ थियो।
​यसैगरी, उपराष्ट्रपतिले एनसीसीद्वारा समाज रूपान्तरणका लागि सञ्चालन भइरहेका विभिन्न सामुदायिक सेवा र सामाजिक चेतनामूलक अभियानहरूको समेत खुलेर प्रशंसा गर्नुभयो। विशेष गरी देशलाई लागूऔषधमुक्त बनाउने उद्देश्यका साथ सञ्चालित ‘नशा मुक्त भारत अभियान’ र पर्यावरण एवं सरसफाइमा केन्द्रित ‘स्वच्छ भारत अभियान’ जस्ता सामाजिक कार्यहरूमा एनसीसी क्याडेटहरूको सक्रियता गौरवपूर्ण रहेको उहाँले उल्लेख गर्नुभयो। यसका साथै, एनसीसीका भूतपूर्व क्याडेटहरूलाई एउटै मञ्चमा जोड्नका लागि ‘एनसीसी एल्युम्नाई एशोसिएशन’ (भूतपूर्व क्याडेट सङ्गठन) को स्थापना गरिएकोमा खुसी व्यक्त गर्दै उहाँले यस कदमको स्वागत गर्नुभएको छ।