​दक्षिण २४ परगना: पश्चिम बंगालको दक्षिण २४ परगना जिल्लाअन्तर्गत बकखाली तट नजिकै समुद्रमा भएको दुखद ट्रलर दुर्घटनामा मृत्यु हुनेको संख्या ९ पुगेको छ। गत आइतबार फेला परेको ‘मा काली’ नामक माछा मार्ने ट्रलरबाट आइतबार राति थप चार जना माझी (माछा मार्ने व्यक्ति) को शव बरामद भएपछि मृतकको संख्या बढेको हो। यसअघि आइतबार दिउँसो नै पाँच जनाको शव फेला परेको थियो। दुर्घटनामा परेका अन्य ६ जना माझी अझै बेपत्ता छन् र उनीहरूको खोजी कार्य तीव्र पारिएको छ।
​प्रशासनिक अधिकारी तथा स्थानीय माझीहरूको टोलीले रातभर ट्रलरभित्र र वरपर सघन खोज तथा उद्धार अभियान सञ्चालन गरेको थियो। दुर्घटनाको समयमा केही माझीहरू समुद्रको उच्च छालमा बगेर हराएको हुन सक्ने आशंका गरिएको छ। घटनाबारे पश्चिम बंगालकी मुख्यमन्त्री ममता बनर्जीलाई जानकारी गराइसकिएको छ भने राज्य सरकारले थप आवश्यक कदम चाल्ने तयारी गरिरहेको छ।
​सुन्दरवन विकास विभागका राज्यमन्त्री दीपंकर जानाले आइतबार राति घटनास्थल पुगेर पाथरप्रतिमा अन्तर्गत गोवर्धनपुर कोस्टल पुलिस थाना क्षेत्रको सीतारामपुर घाटमा सञ्चालन भइरहेको राहत तथा उद्धार अभियानको अनुगमन गरेका थिए। उद्धार कार्यमा काकद्वीप उपविभागीय प्रशासन, सुन्दरवन पुलिस, गोवर्धनपुर कोस्टल पुलिस, वन विभाग तथा माझी संगठनका प्रतिनिधिहरू सक्रिय रूपमा खटिएका छन्।
​जानकारीअनुसार दिघाको शंकरपुर बन्दरगाहबाट गत २ जुलाईका दिन ‘मा काली’ ट्रलर माछा मार्नका लागि समुद्रतर्फ प्रस्थान गरेको थियो। तर, ५ जुलाईपछि उक्त ट्रलरसँगको सम्पर्क एकाएक विच्छेद हुन पुग्यो। ट्रलर बेपत्ता भएपछि पुलिस, भारतीय तटरक्षक बल (कोस्ट गार्ड), नौसेना, वन विभाग र माझी संगठनहरूले संयुक्त रूपमा खोजी अभियान सुरु गरेका थिए। गत आइतबार बकखाली तटबाट करिब ३५ किलोमिटर टाढा चुलकाठी जंगल नजिकै बाघेरचर क्षेत्रमा यो ट्रलर पल्टिएको अवस्थामा फेला परेको थियो। संयुक्त उद्धार टोलीले ट्रलरलाई सीतारामपुर घाटमा ल्याएर तलाशी लिने क्रममा अहिलेसम्म ९ वटा शव फेला पारेको हो।