​नयाँ दिल्ली: भारत र जापानबीचको रणनीतिक तथा विश्वव्यापी साझेदारीलाई थप सुदृढ बनाउने उद्देश्यका साथ नयाँ दिल्लीमा १६औँ भारत-जापान वार्षिक शिखर सम्मेलन सम्पन्न भएको छ। भारतीय प्रधानमन्त्री नरेन्द्र मोदीको निमन्त्रणामा भारत भ्रमणमा रहेकी जापानी प्रधानमन्त्री सनाए ताकाइची र पीएम मोदीबीच भएको द्विपक्षीय वार्तामा रक्षा, आर्टिफिसियल इन्टेलिजेन्स (AI), सेमिकन्डक्टर र स्वास्थ्य लगायतका क्षेत्रमा सहकार्य बढाउने सहमति भएको छ।
​युद्धपोत निर्माणबारे विदेश सचिवको स्पष्टीकरण
सञ्चार माध्यमहरूमा दुई देशबीच ‘मोगामी-क्लास फ्रिगेट’ (आधुनिक युद्धपोत) को संयुक्त निर्माण हुन लागेको चर्चा चलिरहेका बेला भारतका विदेश सचिव विक्रम मिस्रीले यसको खण्डन गरेका छन्। उनले दुई प्रधानमन्त्रीबीचको बैठकमा यो विशिष्ट युद्धपोतको विषयमा कुनै विशेष छलफल नभएको स्पष्ट पारे। यद्यपि, दुवै नेताले हवाई, स्थल र नौसैनिक प्रणालीका विभिन्न क्षेत्रमा सहकार्य गर्न सक्ने सम्भावनाहरूमाथि विचार विमर्श गरेको र उपयुक्त समयमा यस परियोजनामा पनि वार्ता हुनसक्ने विदेश सचिवले बताएका छन्।
​१० ट्रिलियन येन लगानी गर्ने जापानको लक्ष्य~
बैठकपछि सञ्चारकर्मीहरूलाई सम्बोधन गर्दै प्रधानमन्त्री मोदीले जापानले आगामी १० वर्षमा भारतमा १० ट्रिलियन येन (करिब ५.९ लाख करोड रुपैयाँ) लगानी गर्ने लक्ष्य राखेको जानकारी दिए। यस बृहत् लगानीमार्फत भारतमा जापानी कम्पनीहरूको संख्यालाई दोब्बर बनाउने र दुई देशको आर्थिक कुटनीतिलाई नयाँ उचाइमा पुर्‍याउने लक्ष्य राखिएको छ।