​कोलकाता: कोलकाता हाईकोर्ट परिसरमा पूर्व मुख्यमन्त्री ममता बनर्जी विरुद्ध भएको नाराबाजीलाई लिएर पश्चिम बंगालको राजनीति तातिएको छ। भारतीय जनता पार्टीका प्रदेश अध्यक्ष शमिक भट्टाचार्यले यस घटनामा भाजपाको कुनै संलग्नता नरहेको स्पष्ट पार्दै यस्तो व्यवहार पार्टीको राजनीतिक संस्कृति विपरीत भएको बताउनुभएको छ। उहाँका अनुसार एक पूर्व मुख्यमन्त्री र महिला विरुद्ध यस्तो भाषा प्रयोग गर्नु भाजपाको नीति होइन, बरु यो स्थिति तृणमूल कांग्रेसकै आफ्ना कार्यहरूको परिणाम हो।
​बिहीबार निर्वाचन पछिको हिंसासँग सम्बन्धित एउटा मुद्दामा बहसका लागि ममता बनर्जी आफैं वकिलको रूपमा हाईकोर्ट पुग्नुभएको थियो। इजलासबाट बाहिर निस्कने क्रममा केही वकिलहरूले उहाँ विरुद्ध ‘चोर-चोर’ भन्दै नाराबाजी र आपत्तिजनक टिप्पणी गरेपछि स्थिति तनावपूर्ण बनेको थियो। सुरक्षाकर्मीले उहाँलाई स्कर्टिङ गरेर बाहिर निकालेका थिए भने ममता बनर्जीले आफूमाथि हातपात र धक्कामुक्की भएको आरोप लगाउनुभएको छ। यस घटनालाई लिएर तृणमूल सांसद कल्याण बनर्जीले अदालत परिसरकै सुरक्षामा प्रश्न उठाउनुभएको छ।
​यता भाजपा नेता भट्टाचार्यले भने यो विरोध प्रदर्शन तृणमूल भित्रैको असन्तुष्टिको उपज भएको दाबी गर्नुभएको छ। उहाँले राज्यमा सत्ताको लाभ पाउने र नपाउनेहरू बीचको द्वन्द्व सडक र अदालतसम्म पुगेको टिप्पणी गर्दै भाजपा सधैं स्वस्थ राजनीतिक वातावरणको पक्षमा रहेको उल्लेख गर्नुभयो। अदालतमा ममता बनर्जीले आफ्ना कार्यकर्तामाथि हमला भएको गुनासो गरिरहँदा भाजपाले पनि आफ्ना कार्यकर्ताहरू हिंसाको शिकार भइरहेको बताउँदै राज्यको राजनीतिक वातावरण सुधार्नुपर्नेमा जोड दिएको छ।