बागडोग्रा: मोथाबारी विरोध प्रदर्शन घटनाका मुख्य आरोपी मोफक्केरुल इस्लामलाई राज्य सीआईडीले शुक्रबार बिहान बागडोग्रा विमानस्थल बाट पक्राउ गरेको छ। उनीसँगै उनका एक सहयोगी अकरामुल बागानीलाई पनि नियन्त्रणमा लिइएको छ।
पुलिस स्रोतका अनुसार घटनापछि फरार रहेका इस्लामविरुद्ध पक्राउ पुर्जी जारी गरिएको थियो। गोप्य सूचनाका आधारमा सीआईडी टोलीले उनलाई बागडोग्रा विमानस्थलमा पत्ता लगाई पक्राउ गरेको हो। उनी बेंगलुरु भाग्ने योजनामा रहेको बताइएको छ।
पक्राउपछि दुवैलाई बागडोग्रा प्रहरी चौकीमा लगिएको थियो। त्यसपछि सीआईडी टोलीले मोफक्केरुल इस्लामलाई थप अनुसन्धानका लागि माल्दा लगेको जनाएको छ।
माल्दा लैजानुअघि आरोपीले मतदाता सूचीबाट नाम हटाउने विषयमा भइरहेको विरोध प्रदर्शन जारी रहने र आफू त्यसको पक्षमा रहने बताएका थिए। साथै उनले आफू घटनामा संलग्न नरहेको दाबी गर्दै यसअघि गरेको सामाजिक सञ्जाल प्रत्यक्ष प्रसारणको उल्लेख गरेका छन्, जुन पछि हटाइएको थियो।
यस घटनासम्बन्धी थप अनुसन्धान जारी रहेको पुलिसले जनाएको छ।