वाशिङ्टनः अमेरिका बाट चार अन्तरिक्ष यात्री बुधबार चन्द्रमातर्फ प्रस्थान गरेका छन्, जुन ५० वर्षभन्दा बढी समयपछि पहिलो मानवसहितको चन्द्र अभियान हो। यो मिसन नासाको आगामी दुई वर्षभित्र चन्द्रमामा अवतरण गर्ने योजनाको प्रारम्भिक चरण हो।
अमेरिकाका तीन र क्यानडाका एक अन्तरिक्ष यात्री बोकेको ३२ तले आर्टेमिस-२ रकेट कैनेडी स्पेस सेंटर बाट प्रक्षेपण गरिएको हो। उक्त ऐतिहासिक क्षण अवलोकन गर्न हजारौं मानिसहरू उपस्थित थिए भने वरपरका सडक र समुद्री किनाराहरू पनि भरिभराउ थिए। यो दृश्यले १९६०-७० को दशकका अपोलो अभियानहरूको सम्झना दिलाएको छ।
यो मिसन चन्द्रमामा दीर्घकालीन मानव उपस्थिति स्थापना गर्ने दिशामा महत्वपूर्ण कदमका रूपमा हेरिएको छ। यही प्रक्षेपण स्थलबाट पहिले अपोलो मिसनहरू पनि सञ्चालन गरिएको थियो।
मिसनका कमाण्डर रीड वाइज़मैनले “चन्द्रमातिर जाऔं!” भन्ने उद्घोषसहित अभियानको नेतृत्व गरेका छन्। उनका साथमा पाइलट विक्टर ग्लोवर, मिशन विशेषज्ञ क्रिस्टीना कोच तथा क्यानडाका जेरेमी हैनसेन सहभागी छन्। यो अहिलेसम्मकै सबैभन्दा विविध टोली हो, जसमा पहिलोपटक महिला, अश्वेत समुदायका प्रतिनिधि र गैर-अमेरिकी नागरिक समावेश छन्।
क्याप्सुलमार्फत चन्द्रमाको नजिकबाट यात्रा
अन्तरिक्ष यात्रीहरू १० दिने परीक्षण उडानमा रहेका छन्। सुरुवाती २५ घण्टा पृथ्वीको कक्षामा रहेर क्याप्सुल परीक्षण गरिनेछ, त्यसपछि मुख्य इन्जिनमार्फत चन्द्रमातर्फ प्रस्थान गरिनेछ। उनीहरू चन्द्रमामा अवतरण नगरी नजिकबाट पार गर्दै करिब ६,४०० किलोमिटर टाढासम्म पुगेर फर्किनेछन् र अन्ततः प्रशान्त महासागरमा अवतरण गर्नेछन्। यससँगै उनीहरू मानव इतिहासमा सबैभन्दा टाढा यात्रा गर्ने अन्तरिक्ष यात्री बन्नेछन्।
आठ दिने यात्रामा विश्वको ध्यान
यो मिसन आर्टेमिस-१ पछि करिब तीन वर्षमा भएको हो, जसमा कुनै मानव सवार थिएनन्। आर्टेमिस-२ मा पहिलोपटक जीवन रक्षक प्रणाली, पानी आपूर्ति र अन्य आवश्यक सुविधाहरू प्रयोग गरिएको छ, जसले जोखिम पनि बढाएको छ। त्यसैले नासाले प्रत्येक चरण सावधानीपूर्वक परीक्षण गर्दै अघि बढिरहेको जनाएको छ।