गुवाहाटी: असमका मुख्यमन्त्री हिमन्त बिस्वा सरमा ले विधानसभा चुनावअघि भाजपा घोषणापत्र सार्वजनिक गर्दै सत्ता फर्किएमा ३ महिनाभित्र समान नागरिक संहिता (यूसीसी) लागू गर्ने प्रतिबद्धता जनाएका छन्।
उनले यूसीसीलाई आदिवासी तथा अन्य जातीय समुदायको अधिकारमा असर नपर्ने गरी लागू गरिने बताए। साथै ‘लभ जिहाद’ विरुद्ध कडा कानुन ल्याउने, अवैध अतिक्रमण हटाउने र अवैध आप्रवासी निष्कासन प्रक्रिया तीव्र बनाउने उल्लेख गरेका छन्।
मुख्यमन्त्री सरमाले राज्यको जमिन घुसपैठियाबाट मुक्त गरिने र अवैध कब्जाविरुद्ध कडा कारबाही गरिने बताए। यद्यपि, घुसपैठ समस्या समाधानका लागि निश्चित समयसीमा तय गर्न कठिन हुने उनले स्वीकार गरे।
महिला र किसानका लागि आकर्षक योजना
घोषणापत्रमा विभिन्न विकास तथा कल्याणकारी कार्यक्रमहरू समावेश छन्:
महिलालाई मासिक ३,००० रुपैयाँ
साना किसानलाई वार्षिक ११,००० रुपैयाँ सहयोग
युवाका लागि २ लाख सरकारी रोजगारी
१० लाख उद्यमी उत्पादन गर्ने योजना
बालविकासदेखि स्नातकोत्तर तहसम्म निःशुल्क शिक्षा
यसका साथै बाढी नियन्त्रणका लागि १,८०० करोड रुपैयाँ को योजना र ५०,००० करोड रुपैयाँ लगानीमा स्वास्थ्य पूर्वाधार विकास गर्ने घोषणा गरिएको छ।
कांग्रेसमाथि आरोप
महाराष्ट्रका मुख्यमन्त्री देवेन्द्र फडणवीस ले असममा आयोजित सभामा कांग्रेसले राज्यको उपेक्षा गरेको आरोप लगाउँदै भाजपा सरकारले विकास र पहिचान दुवैको संरक्षण गरेको दाबी गरे।