सिलगढी: सिलगढी विधानसभा क्षेत्रका उम्मेदवार डा. शंकर घोषको समर्थनमा वार्ड नं. १३ र वार्ड नं. १० मा आयोजित उत्साहपूर्ण चुनावी अभियानमा आज दार्जिलिङ लोकसभा सांसद राजु विष्ट सहभागी भए।

प्राप्त जानकारी अनुसार सांसद राजु विष्टले अभियानका क्रममा भारतीय जनता पार्टीको पक्षमा सिलगढी र आसपासका क्षेत्रलाई द्रुत विकासको केन्द्रका रूपमा रूपान्तरण गर्ने प्रतिबद्धता दोहोर्याए।
उनले आधुनिक सडक, रिङ रोड तथा निर्बाध यातायात सञ्जाल विस्तारमार्फत उत्तरपूर्व र हिमालय क्षेत्रको प्रवेशद्वारका रूपमा सिलगढीलाई सुदृढ बनाइने योजना प्रस्तुत गरिएको छ भने। सिलगढीदेखि वाराणसीसम्म उच्चगति रेल सेवा सञ्चालनको सम्भावनाले यस क्षेत्रको विकासलाई थप तीव्र बनाउने उल्लेख गरे।
यसैगरी सांसद राजु विष्टले सांस्कृतिक विविधता र प्राकृतिक सौन्दर्यको प्रवर्द्धनमार्फत पर्यटन क्षेत्रलाई विस्तार गरिने तथा नयाँ औद्योगिक पार्क, सूचना प्रविधि केन्द्र र व्यापारिक केन्द्रहरूको स्थापना गरी युवाका लागि हजारौँ रोजगारीका अवसर सिर्जना गरिने प्रतिबद्धता व्यक्त गरे।
साथै, सुदृढ स्वास्थ्य सेवा, गुणस्तरीय शिक्षा र स्मार्ट शहरी योजनामार्फत सिलगढी तथा सम्पूर्ण उत्तर बंगाल क्षेत्रमा समावेशी विकास र दीर्घकालीन समृद्धि सुनिश्चित गरिने बताए।