कोलकाता: असम र पश्चिम बंगालमा हुन गइरहेको विधानसभा चुनावलाई ध्यानमा राख्दै सवारीसाधनको आदान–प्रदान सहज बनाउन नवान्नले सतर्कता बढाएको छ। निर्वाचन आयोगको निर्देशनमा दुवै राज्यका मुख्य सचिव र वरिष्ठ अधिकारीहरूबीच भएको हालैको बैठकमा आपसी समन्वयलाई अझ मजबुत बनाउने विषयमा जोड दिइएको थियो। दुवै पक्षले एकअर्कालाई सबै सम्भव सहयोग गर्ने आश्वासन दिएका छन्।
असम विधानसभा चुनावका लागि पश्चिम बंगालबाट करिब ३,५०० सवारीसाधन माग गरिएको छ, जसमा करिब १,५०० बसहरू समावेश छन्। उत्तर बंगाल यातायात निगमसँग पर्याप्त बस नभएकाले अन्य जिल्लाबाट बसहरू ल्याइँदै छन्। त्यस्तै, काेचबिहार जिल्लाले असमका कोकराझार र धुबरी जिल्लाबाट करिब ४०० सवारीसाधन लिनेछ।
काेचबिहारमा कुल २,५३७ मतदान केन्द्र रहेका छन्, जहाँ चुनाव कर्मचारी र पुलिस बलको तैनाथीका लागि करिब २,६०० सवारीसाधन आवश्यक पर्नेछ। यसबाहेक केन्द्रीय बलको आवतजावतका लागि पनि थप सवारीसाधन आवश्यक छ। हाल जिल्लामा केवल एक तिहाइ सवारीसाधन उपलब्ध छन्, बाँकी असमबाट ल्याइनेछ।
विशेषज्ञहरूका अनुसार अप्रिल महिनामा सडकमा सवारीसाधनको अभावका कारण सर्वसाधारणले केही असुविधा भोग्नुपर्ने हुन सक्छ। चुनावपछि यी सवारीसाधन फिर्ता ल्याएर उत्तर बंगालमा मतदान यन्त्र र कर्मचारीहरूको ढुवानीमा प्रयोग गरिनेछ।