नयाँ दिल्ली: इरानले गरेको आक्रमणपछि सोमबार कुवेतस्थित संयुक्त राज्य अमेरिकाको दूतावास, परिसरभित्र आगोका लप्का र बाक्लो धुवाँ देखिएको छ। समाचार एजेन्सी एपीले प्राप्त गरेको भिडियोमा घटनास्थल वरपर सायरन बजिरहेको र धुवाँ फैलिएको दृश्य देखिन्छ।
घटनापछि संयुक्त राज्य अमेरिकाले कुवेतमा रहेका आफ्ना नागरिकलाई सुरक्षित स्थानमा बस्न र घरभित्रै रहन तत्काल आग्रह गरेको छ। दूतावासले जारी गरेको सूचनामा “दूतावास नआउनुहोस्” भनिएको छ, यद्यपि आक्रमणबारे विस्तृत विवरण सार्वजनिक गरिएको छैन।
दूतावास नजिकै बस्ने एक मिस्री कामदार अयमान मोआदका अनुसार उनले सोमबार उक्त क्षेत्रमा धुवाँ देखेका थिए। तर आक्रमण दूतावासलाई नै लक्षित गरेर गरिएको हो वा होइन भन्नेबारे स्पष्ट जानकारी नभएको उनले बताए।
यसैबीच दुबईमा पनि केही स्थानमा विस्फोटजस्ता आवाज सुनिएको खबर छ, जसले क्षेत्रीय तनाव थप चर्काएको छ। घटनाबारे थप विवरण आउन बाँकी रहेको छ भने सुरक्षा निकायहरूले अवस्थामाथि निगरानी बढाएका छन्।