अहमदाबाद: आईसीसी टी२० वर्ल्ड कपको ग्रुप चरणमा अजेय रहने भारतले सुपर ८ राउण्डको पहिलो म्याचमै दक्षिण अफ्रिकाविरुद्ध ७६ रनले हारको सामना गर्नु पऱ्यो। नरेन्द्र मोदी स्टेडियममा आइतवार टस जितेर पहिला ब्याटिंग गर्दै दक्षिण अफ्रिकाले २० ओभरमा ७ विकेट गुमाएर १८७ रन बनायो। त्यसपछि भारतीय टीम १८.५ ओभरमा केवल १११ रन बनाएर अलआउट भयो। म्याचमा पहिला ब्याटिंग गर्दै केवल २० रनमा ३ विकेट गुमाएपछि दक्षिण अफ्रिकाको निम्ति डेविड मिलर र डेवाल्ड ब्रेविसले असाधारण ब्याटिंग गरे। यी दुईजनाले चौथो विकेटको निम्ति ९७ रनको पार्टनरशीप गरे। डेविडले ३५ बलमा ७ वटा चौका र ३ वटा छक्काको साथ ६३ रन बनाए जबकि ब्रेविसले ३ वटा छक्का र ३ वटा चौकाको सहायताले २४ बलमा ४४ रन बनाए। यी दुईजना आउट भएपछि ट्रिस्टन स्टब्सले २४ बलमा अविजित ४४ रन बनाए, जसमा ३ वटा छक्का र एउटा चौका सामेल छ। भारतीय बलरहरूमा जसप्रीत बुमराहले सर्वाधिक ३ विकेट लिए। त्यसपछि म्याच जित्न १८८ रनको लक्ष्यलाई पीछा गर्दै भारतले शुरुदेखि नै विकेट गुमाउन थाल्यो। यसरी भारतले केवल ५१ रनमा ५ विकेट गुमायो। भारतको शीर्ष क्रममा अभिषेक शर्माले १५, तिलक वर्माले १, कप्तान सूर्यकुमार यादवले १८ र वाशिंगटन सुन्दरले ११ रन बनाए जबकि ईशान किशन खाता पनि नखोली आउट भए। त्यसपछि मुश्किल परिस्थितिबीच शिवम दुबेले ४२ रन बनाए पनि दक्षिण अफ्रिकालाई म्याच जित्न कुनै समस्या भएन। दुबेले ३७ बल खेलेर ३ वटा छक्का र एउटा चौका लगाए। हार्दिक पाण्ड्या १८ र रिंकू सिंह शून्य रनमा आउट भए। दक्षिण अफ्रिकी बलरहरूमा मार्को यानसनले सर्वाधिक ४ विकेट लिए।