सिरिया: इरानसँग बढ्दो तनावबीच अमेरिकाले सिरियाबाट आफ्ना बाँकी रहेका सैनिक फिर्ता बोलाउने तयारी गरेको छ। अमेरिकी अधिकारीहरूका अनुसार सिरियाली सरकारले आफ्नै सीमाभित्र आतंकवादविरुद्ध नेतृत्व लिन सहमति जनाएपछि अमेरिकी सैन्य उपस्थितिको आवश्यकता घटेको हो।
अमेरिकी सेना सन् २०१५ देखि इस्लामिक स्टेट समूह (आईएस) विरुद्धको अभियान अन्तर्गत सिरियामा तैनाथ गरिएका छन्। हाल करिब एक हजार अमेरिकी सैनिक त्यहाँ रहेका छन्।
अधिकारीहरूका अनुसार सैनिक फिर्ता गर्ने निर्णय: अवस्था–आधारित संक्रमणको हिस्सा हो, र अमेरिका क्षेत्रीय सुरक्षामा कुनै खतरा देखिए तत्काल प्रतिक्रिया दिन तयार रहने जनाएको छ। इरानसँग तनाव बढ्दै जाँदा अमेरिकी राष्ट्रपति डोनाल्ड ट्रम्पले मध्य पूर्वमा सैन्य उपस्थिति बढाएपछि यो निर्णय आएको हो।
अमेरिकाले विश्वको सबैभन्दा ठूलो युद्धपोत युएसएस जेराल्ड आर फोर्डलाई मध्य पूर्वमा पठाएको बताइएको छ, जुन अर्को तीन हप्ता भित्र यस क्षेत्रमा आइपुग्ने अपेक्षा गरिएको छ।
राष्ट्रिय सुरक्षा अधिकारीहरूका अनुसार सम्भावित आक्रमणको तयारीबारे छलफल भए पनि अन्तिम निर्णय भने अझै गरिएको छैन।
सिरियामा भने पछिल्लो समय सुरक्षामा सुधार आएको दाबी गरिएको छ। ट्रम्प प्रशासनले सिरियाली राष्ट्रपति अहमद अल-शारासँग कूटनीतिक सम्बन्ध सुदृढ गर्न पहल गरिरहेको छ। यसैबीच, कुर्दिश नेतृत्वको सिरियाली प्रजातान्त्रिक बललाई राष्ट्रिय सेनामा एकीकृत गर्ने सम्झौता पनि भएको छ।