सिलगढी: दार्जीलिङ पहाड, तराई र डुवर्स क्षेत्रका लागि सोमवार एउटा ऐतिहासिक दिन रहेको छ। सेभोक रेलवे स्टेशनबाट पहिलोपल्ट लामो दूरीको रेल ‘सिक्किम महानन्दा एक्सप्रेस’ को शुभारम्भ गरिएको छ। यो रेलले अब अलिपुरद्वारदेखि दिल्लीसम्मको सोझै सम्पर्क जोड्नेछ। यस रेल सेवाको सुरुवातसँगै सेभोक, कालीझोडा, लोहापुल, लाटपञ्चर, सिटोङ, रम्बी, टिस्टा, लोप्चु, पेशोक, टिस्टा भ्याली, कालेबुङ, डुवर्स र सिक्किमका बासिन्दाहरू प्रत्यक्ष रूपमा लाभान्वित हुनेछन्। दार्जिलिङका सांसद राजु विष्टका भनाईअनुसार सेभोक क्षेत्र अहिले ठूला विकासमूलक गतिविधिहरूको केन्द्र बनेको छ। क्षेत्रको कायापलट गर्न धेरै महत्त्वपूर्ण परियोजनाहरू अघि बढिरहेका छन्। बालासनदेखि सेभोकसम्मको ‘एलिभेटेड हाइवे कोरिडोर’ को आधा काम निर्माणको अन्तिम चरणमा छ। सेभोक र एलेनबारीलाई जोड्न कोरोनेसन ब्रिजको विकल्पका रूपमा नयाँ पुलको काम छिट्टै सुरु हुनेछ। सिलगढी रिंग रोड पनि सेभोक भएरै जानेछ। यसको साथै, दिसम्बर २०२७ सम्ममा सेभोक-रम्फू रेल लाइन पनि पूर्ण रूपमा सञ्चालनमा आउने लक्ष्य राखिएको छ। आर्थिक समृद्धि र आभार यी पूर्वाधार परियोजनाहरूले यस क्षेत्रको आर्थिक वृद्धिमा ठूलो योगदान पुर्याउने र कनेक्टिभिटीमा क्रान्तिकारी परिवर्तन ल्याउने विश्वास व्यक्त गरिएको छ। यस ऐतिहासिक उपलब्धिको लागि दार्जीलिङका सांसद तथा भाजपाका राष्ट्रिय प्रवक्ता राजु विष्टले प्रधानमन्त्री नरेन्द्र मोदी, रेल मन्त्री अश्विनी वैष्णव र उत्तर-पूर्वी फ्रन्टियर रेलवेप्रति आभार प्रकट गरेका छन्। यसको साथै, उनले यस मागलाई निरन्तर उठाउने सचेत स्थानीय जनतालाई पनि धन्यवाद दिएका छन्।

“यी परियोजनाहरूले हाम्रो क्षेत्रको पूर्वाधार र सम्पर्कलाई मात्र सुदृढ बनाउँदैनन्, बरु आर्थिक विकासको नयाँ बाटो पनि खोल्नेछन् भनी सांसद राजु विष्टले बताएका छन्।