ढाका: बंगलादेशको महत्वपूर्ण आम निर्वाचनका लागि बिहीबार बिहानदेखि मतदान सुरु भएको छ। सन् २०२४ को अगस्टमा देशव्यापी आन्दोलनपछि शेख हसिनाले प्रधानमन्त्री पद त्याग गरेपछि यो निर्वाचन आयोजना गरिएको हो।
देशका ३०० संसदीय सिटमध्ये २९९ सिटमा बिहान ७:३० बजे (स्थानीय समयअनुसार) मतदान सुरु भएको छ, जुन साँझ ४:३० बजेसम्म जारी रहनेछ। मतदान सकिएलगत्तै मतगणना सुरु हुने सम्भावना छ। एक उम्मेदवारको मृत्युका कारण एक निर्वाचन क्षेत्रमा मतदान स्थगित गरिएको छ।
बंगलादेशमा जटिल ८४ बुँदे सुधार प्याकेजसम्बन्धी जनमत संग्रहसँगै आम निर्वाचन पनि भइरहेको छ। मुख्य प्रतिस्पर्धा बंगलादेश नेसनलिस्ट पार्टी (बीएनपी) र यसको पूर्व सहयोगी जमात-ए-इस्लामीबीच रहेको छ। प्रमुख सल्लाहकार मोहम्मद युनुसको नेतृत्वमा रहेको अन्तरिम सरकारले गत वर्ष शेख हसिनाको अवामी लिग पार्टी विघटन गरेको थियो र पार्टीलाई निर्वाचनमा भाग लिन प्रतिबन्ध लगाएको थियो। निर्वाचन आयोगले व्यापक सुरक्षा व्यवस्था गरेको छ र करिब १० लाख सुरक्षाकर्मी परिचालन गरेको छ, जुन देशको निर्वाचन इतिहासकै सबैभन्दा ठूलो तैनाथी मानिएको छ।
कुल ५० राजनीतिक दलका १,७५५ उम्मेदवार र २७३ स्वतन्त्र उम्मेदवार चुनावी मैदानमा छन्। बीएनपीले सबैभन्दा धेरै २९१ उम्मेदवार उठाएको छ। निर्वाचनमा ८३ जना महिला उम्मेदवार सहभागी छन्।
युनुसले छिट्टै निर्वाचित सरकारलाई सत्ता हस्तान्तरण गर्ने बताएका छन्। उनले राजनीतिक दल, उम्मेदवार तथा सम्बन्धित सबै पक्षलाई मतदानको दिन संयम, सहिष्णुता र लोकतान्त्रिक आचरण कायम राख्न आग्रह गरेका छन्।
पुलिसका अनुसार ढाकाका २,१३१ मतदान केन्द्रमध्ये १,६१४ लाई संवेदनशील घोषणा गरिएको छ। यद्यपि सेनाले ढाका सहरका दुई मतदान केन्द्रलाई ‘जोखिमयुक्त’ भनेको छ। पहिलो पटक निर्वाचन सुरक्षाका लागि ड्रोन तथा ‘बडी-वर्न क्यामेरा’ (पोशाकमा जडान गरिने क्यामेरा) प्रयोग गरिएको छ। निर्वाचन आयोगका तथ्यांकअनुसार करिब १२.७ करोड मतदातामध्ये ३.५८ प्रतिशत मतदाता पहिलो पटक मतदान गर्दैछन्।