सिलगढी: पुरपालिकाको निर्देशनअनुसार हाल सिलगढीको बाघा जतिन पार्कसँग जोडिएको क्षेत्रमा खाद्य पसलहरू बस्न पाएका छैनन्। तर यसलाई लिएर पसलेहरूबीच केही असन्तोष देखिएको छ। उनीहरूले बताएका छन् ‘हामी सबैले खराब खाना बेच्दैनौँ, यसरी हाम्रो पेटमै लात हानिएको जस्तो भयो। अब हामी कसरी गुजारा चलाउने? वर्षौंदेखि यिनै खाद्य पसल चलाएर हामीले परिवार पालेका छौँ। अचानक प्रशासनले हस्तक्षेप गर्दा हामी समस्यामा परेका छौँ। अब पसल कहाँ सार्ने, कसरी सार्ने, केही बुझ्न सकिरहेका छैनौँ।
उनीहरूले थप भने, कलेजपाडामा हाम्रो एउटा छुट्टै पहिचान थियो। अचानक बन्द हुँदा हामी अप्ठ्यारो अवस्थामा परेका छौँ। नयाँ ठाउँ तुरुन्तै खोज्न पनि सक्दैनौँ। लामो समयदेखि बाघा जतिन पार्कको अगाडि चलिरहेका खाद्य पसलहरू बन्द गरिँदा सबै पसलेहरू समस्यामा परेका छन्, विशेषगरी त्यहीँ क्षेत्रका स्थानीय पसलेहरू।
यसैबीच, त्यहाँ खाना खान आउने वा आउँदै आएका ग्राहकहरूले पनि असन्तोष व्यक्त गरेका छन्। उनीहरूले भने- हामी सबै बाहिरबाट आएका मानिस हौँ, हरेक दिन होटलमा खाना खानु हामीलाई सम्भव हुँदैन। यहाँ खान सजिलो थियो, कुनै समस्या थिएन। अचानक बन्द हुँदा हामी पनि समस्यामा परेका छौँ। कुनै वैकल्पिक व्यवस्था गरिदिए राम्रो हुन्थ्यो, उनीहरूको माग छ।