नयाँ दिल्ली: भारत सरकारले उत्तर–पूर्वी राज्यहरूलाई देशको बाँकी भागसँग जोड्ने रणनीतिक रूपमा अत्यन्त संवेदनशील सिलीगुडी कोरिडोर (चिकेन नेक) लाई थप सुरक्षित बनाउने योजना अघि सारेको छ। यस योजनाअन्तर्गत पश्चिम बंगालको उक्त क्षेत्रमा भूमिगत रेल मार्ग निर्माण गरिने भएको छ।
रेल मन्त्री अश्विनी वैष्णवका अनुसार नेपाल, भूटान र बंगलादेशले घेरिएको करिब ४० किलोमिटर लामो यस क्षेत्रमा सुरक्षा र निरन्तर आवागमन सुनिश्चित गर्न भूमिगत रेल ट्र्याक बिछाउने प्रस्ताव गरिएको हो। यो योजना उत्तर–पूर्व भारतको सम्पर्क सुदृढ बनाउने केन्द्र सरकारको दीर्घकालीन रणनीतिक पहलको हिस्सा हो।
नर्थ–ईस्ट फ्रन्टियर रेलवेका महाप्रबन्धक चेतन श्रीवास्तवले बताएअनुसार भूमिगत रेल खण्ड पश्चिम बंगालको टिन माइल हाटदेखि रंगपानी स्टेशनसम्म निर्माण गरिनेछ। साथै, बजेट प्रस्तावमा यस मार्गमा रेल लाइनको संख्या चारवटा पुर्‍याउने योजना पनि समावेश गरिएको छ।
विशेषज्ञहरूका अनुसार सिलीगुडी कोरिडोर भारतका आठवटा उत्तर–पूर्वी राज्यहरूलाई बाँकी देशसँग जोड्ने एकमात्र स्थलीय मार्ग हो। यसको सबैभन्दा साँघुरो भाग करिब २०–२५ किलोमिटर मात्र चौडा छ, जसमा कुनै अवरोध उत्पन्न भए सम्पूर्ण उत्तर–पूर्व क्षेत्रको आपूर्ति र आवागमन प्रभावित हुन सक्छ।
सरकारी स्रोतहरूका अनुसार भूमिगत रेल मार्ग निर्माणले आपतकालीन अवस्थामा पनि यातायात र रणनीतिक आवागमन निरन्तर राख्न मद्दत पुर्‍याउनेछ। यो परियोजना भारतको राष्ट्रिय सुरक्षा र पूर्वाधार सुदृढीकरणको दृष्टिले महत्वपूर्ण मानिएको छ।