इस्लामाबाद: पाकिस्तानको सेनाले अशान्त बलुचिस्तान प्रान्तमा सञ्चालन गरिएका आतंकवादविरोधी कारबाहीमा कम्तीमा १५ सैनिकको मृत्यु भएको र ९२ आतंककारी मारिएको जनाएको छ।
सेनाका अनुसार शनिबार जातीय बलुच समूहसँग सम्बन्धित आतंककारीहरूले विभिन्न स्थानमा आक्रमण गरेपछि सुरक्षा कारबाही सुरु गरिएको हो। क्वेटा, मस्तुङ, नुश्की, दल्बन्दिन, खरान, पंजगुर, तुम्प, ग्वादर र पसनी आसपासका क्षेत्रमा आतंककारी गतिविधि गरी शान्ति भंग गर्ने प्रयास गरिएको थियो।
सेनाको विज्ञप्तिमा भनिएको छ कि सुरक्षा निकाय र कानुन कार्यान्वयन संस्थाहरूले उच्च सतर्कताका साथ तुरुन्तै प्रतिक्रिया जनाउँदै ती प्रयासहरू विफल पारे। ‘‘लामो, भीषण र साहसिक कारबाहीका क्रममा तीन आत्मघाती आक्रमणकारीसहित ९२ आतंककारी मारिएका छन्,’’ विज्ञप्तिमा उल्लेख छ।
आतंककारी आक्रमणमा महिला, बालबालिका, वृद्ध र मजदुरसहित १८ सर्वसाधारणको पनि मृत्यु भएको सेनाले जनाएको छ। कारबाही र त्यसपछिका मुठभेडमा १५ सैनिकले ज्यान गुमाएका छन्।
यसअघि शनिबार नै पंजगुर र हरनाई जिल्लामा गरिएको छुट्टाछुट्टै कारबाहीमा प्रतिबन्धित संगठन तहरीक–ए–तालिबान पाकिस्तान (टीटीपी) सँग सम्बन्धित ४१ आतंककारी मारिएका थिए।
सेनाका अनुसार पछिल्ला दुई दिनमा बलुचिस्तानमा मारिएका आतंककारीको कुल संख्या १३३ पुगेको छ।