भेनेजुएलाकी कार्यवाहक राष्ट्रपति डेल्सी रोड्रिगेजले अमेरिकाबाट आउने आदेशहरू अब सह्य नभएको बताएकी छन् । पूर्वराष्ट्रपति निकोलास मादुरोलाई अमेरिकाले नियन्त्रणमा लिएपछि देशलाई एकताबद्ध गर्ने प्रयासमा रहेकी रोड्रिगेजले वासिङ्टनको दबाबप्रति सार्वजनिक रूपमा असन्तुष्टि जनाएकी हुन् ।

राज्यबाट सञ्चालित टेलिभिजनमार्फत प्रशारण भएको कार्यक्रममा उनले भेनेजुएलाका आन्तरिक राजनीतिक विवाद देशभित्रै समाधान हुनुपर्ने र बाह्य हस्तक्षेप स्वीकार्य नहुने बताएको सीएनएनले जनाएको छ । उनले भेनेजुएलाले चरमपन्थ र फासिवादको परिणाम भोगिसकेको भन्दै राष्ट्रिय स्वाभिमान र सम्मानको माग गरिन् ।

अमेरिकाले मादुरो पक्राउपछि भेनेजुएलामाथि तेल उत्पादन पुनः सुरु गर्न, चीन, रुस, इरान र क्युवासँगको सम्बन्ध तोड्नेलगायत दबाब बढाउँदै आएको छ । यद्यपि, रोड्रिगेजले अमेरिका शत्रु नभएको स्पष्ट पार्दै आपसी सम्मानका आधारमा सम्बन्ध चाहिएको बताइन् । – एजेन्सी