काठमाडौं: अमेरिकी विदेश मन्त्रालयले बुधबार नेपाल, अफगानिस्तान, इरान, रूस, र सोमालियालगायत ७५ देशका नागरिकका लागि आप्रवासी भिसा प्रक्रिया स्थगित गर्ने निर्णय गरेको छ। यो कदम ट्रम्प प्रशासनको तर्फबाट सार्वजनिक सहायतामा निर्भर हुन सक्ने संभावित आप्रवासीहरूलाई लक्षित गर्दै गरिएको हो।

विदेश मन्त्री मार्को रुबियोको नेतृत्वमा रहेको मन्त्रालयले कन्सुलर अधिकारीहरूलाई प्रभावित देशहरूबाट आएका भिसा आवेदनहरू रोक्न निर्देशन दिएको छ। यो निर्णय गत नोभेम्बरमा जारी भएको एक बृहत्तर आदेशसँग सम्बद्ध छ, जसले अमेरिकी सरकारमाथि आर्थिक भार पर्ने जोखिमलाई ध्यानमा राखेको थियो।

यो स्थगन निर्णय ट्रम्पको अमरीकी प्रवेश मापदण्डलाई कडा पार्ने प्रयासको निरन्तरता हो। मन्त्रालयले भनेको छ, “ट्रम्प प्रशासनले अमेरिकी जनताको सम्पत्ति दोहन गर्नेहरूद्वारा भएको अमेरिकी अध्यागमन प्रणालीको दुरुपयोग अन्त्य गर्दैछ।”

समाचार अनुसार, २१ जनवरीदेखि लागू हुने यो स्थगन गैर-आप्रवासी भिसा (पर्यटन वा व्यापारिक भिसा)का लागि लागू हुने छैन। आगामी वर्षहरूमा अमेरिकाले आयोजना गर्न लागेको २०२६ को विश्वकप र २०२८ को ओलम्पिकको कारण गैर-आप्रवासी भिसाको मागमा वृद्धि हुने अपेक्षा गरिएको छ।

साथै, सबै अमेरिकी दूतावास र कन्सुलर कार्यालयहरूलाई पठाइएको सूचनामा गैर-आप्रवासी भिसा आवेदकहरूको जाँच कडा पार्नका लागि निर्देशन दिइएको छ। आवेदकहरूले अमेरिकामा रहँदा सार्वजनिक सहायता नलिने प्रमाण प्रस्तुत गर्नुपर्नेछ। अब कन्सुलर अधिकारीहरूले भिसा आवेदकहरूको व्यक्तिगत विवरण, स्वास्थ्य, पारिवारिक स्थिति, र अङ्ग्रेजी दक्षताको गहन अध्ययन गर्नुपर्नेछ।