कोचबिहार: आगामी १३ जनवरीमा तृणमूल कङ्ग्रेसका सर्वभारतीय महासचिव अभिषेक बन्द्योपाध्याय कोचबिहार आउँदैछन्। कोचबिहारको घुघुमारी कदमतला क्षेत्रमा उनको सभा आयोजना हुनेछ। पार्टीका अनुसार महासचिवको यो सभा ऐतिहासिक हुनेछ र यसलाई “भोट जोगाउने लडाइँको सभा” भनेर भनिएको छ।
सभाअघि आइतबार उत्तरबंग विकास मन्त्री उदयन गुह, तृणमूलका कोचबिहार जिल्ला अध्यक्ष अभिजित दे भौमिक, सांसद जगदीशचन्द्र वर्मा बसुनिया, प्रदेश सांसद (विधायक) सगीता राय, जिल्ला चेयरम्यान गिरिन्द्रनाथ बर्मनलगायत धेरै नेताहरू सभा स्थल निरीक्षण गर्न पुगे।
उही दिन छुट्टै रूपमा तृणमूलका को-अर्डिनेटर तथा प्रदेशका पूर्व मन्त्री रविन्द्रनाथ घोष, उत्तरबंग राज्य यातायात निगमका चेयरम्यान पार्थप्रतिम राय समेत अन्य अधिकारीहरूले पनि सभा स्थल अवलोकन गरे।
कड्कड्याउने जाडोबीच कोचबिहार दक्षिण क्षेत्रको घुघुमारी कदमतला मैदान निरीक्षण गरेपछि जिल्ला अध्यक्ष अभिजित दे भौमिक र पूर्व मन्त्री रविन्द्रनाथ घोषले छुट्टाछुट्टै रूपमा भने, ‘१३ जनवरीको अभिषेक बन्द्योपाध्यायको सभा ऐतिहासिक हुनेछ।
अभिजितले थप जानकारी दिँदै भने कि बलरामपुरको सभास्थल परिवर्तन गरेर अब कार्यक्रम घुघुमारी कदमतला क्षेत्रमा हुनेछ। उनका अनुसार कोचबिहार दक्षिण प्रदेशसभाअन्तर्गत घुघुमारी कदमतला मैदानमा हुने १३ जनवरीको सभा ऐतिहासिक सिद्ध हुनेछ।
यसबाहेक पूर्व मन्त्री रविन्द्रनाथ घोषले भने, ‘आगामी प्रदेशसभा चुनावमा कोचबिहारका धेरैजसो भाजपा नेताहरूको जमानत जप्त हुनेछ। उनका अनुसार आउँदै गरेको यो सभा सबै पुराना रेकर्ड तोड्नेछ।
उता, कोचबिहार जिल्ला पुलिस प्रमुख, अतिरिक्त प्रहरी प्रमुख, ट्राफिक डीएसपी, कोतवाली आइसी तथा दमकल विभागका अधिकारीहरूले पनि मैदान निरीक्षण गरे। पुलिसले सुरक्षासम्बन्धी आवश्यक तयारीहरूको समीक्षा गर्यो।